Ijtimoiy tarmoqlarda Qashqadaryoda YPX inspektori va haydovchi yoqalashgani aks etgan video tarqalgani xabar berilgandi. Viloyat IIB axborot xizmati rahbari Javlon Baxtiyevning “Daryo”ga ma’lumot berishicha, haydovchiga ma’muriy bayonnoma tuzilib, avtomobili jarima maydoniga joylashtirilgan.
Ma’lum qilinishicha, voqea 2022-yilning 7-iyul kuni Qashqadaryo viloyatining Ko‘kdala tuman hududidan o‘tuvchi Yakkabog‘—Sho‘rbozor avtomobil yo‘lining 69-kilometrida sodir bo‘lgan.“Shu hududda xizmat olib borayotgan yo‘l patrul xizmati inspektori Nexia-2 rusumli transport vositasini fuqaro U.U. hujjatlarsiz boshqarib ketayotganini aniqlagan. Huquqbuzarlik holati tegishli tartibda rasmiylashtirib, avtotransport jarima maydoniga olib borilishi zarurati tug‘ilganda haydovchi YPX inspektori talablariga bo‘ysunmagan. Yuzaga kelgan ziddiyatdan foydalanib, transport vositasida voqea joyidan yashiringan”, — deydi Javlon Baxtiyev.
Qo‘shimcha qilinishicha, haydovchiga nisbatan Ma’muriy javobgarlik to‘g‘risidagi kodeksning 194-moddasi (ichki ishlar organlari xodimining qonuniy talablarini bajarmaslik)ga asosan ma’muriy bayonnoma rasmiylashtirilib, avtomashinasi jarima maydoniga joylashtirilgan.
Shuningdek, YPX inspektori harakatlariga huquqiy baho berish maqsadida o‘rnatilgan tartibda xizmat tekshiruvi tayinlangan.
Izoh (0)