42 davlat rahbariyati vakillari Shveysariyaning Lugano shahrida Ukrainani tiklash bo‘yicha konferensiyaning yakuniy deklaratsiyasini imzoladi. Ular Ukrainaning xalqaro miqyosda tan olingan chegaralari doirasidagi suvereniteti va hududiy yaxlitligini to‘liq qo‘llab-quvvatlashini tasdiqladi.
Deklaratsiyani imzolagan davlatlar Ukraina tashabbusi bilan ishlab chiqilgan Tiklanish va rivojlanish rejasi loyihasini ko‘plab manfaatdor tomonlar va hamkorlarning kelishilgan ishtirokini ta’minlovchi asosiy asos hujjati sifatida tan oldi.
Shuningdek, ular Ukraina hukumati hamda barcha ikki tomonlama va ko‘p tomonlama sheriklar, tashkilotlar va xalqaro moliya institutlari o‘rtasida tiklanish va rivojlanish rejasini tayyorlash hamda amalga oshirish uchun samarali muvofiqlashtiruvchi platforma yaratishni qo‘llab-quvvatladi.
Ular Ukrainani qayta qurish jarayonida xalqaro qoidalar, standartlar va tan olingan tamoyillarga muvofiq rivojlanishni adolatli va shaffof moliyalashtirish, kreditlash va qarz olish muhimligini ta’kidladilar.
4-iyul kuni Ukraina bosh vaziri Denis Shmigal Luganoda Ukrainani tiklash rejasi allaqachon 750 milliard dollarga baholanayotganini ma’lum qildi hamda “Rossiya va rossiyalik oligarxlarning musodara qilingan aktivlari tiklanishning asosiy manbayi bo‘lishi kerak”, deya fikr bildirdi.
Iqtisodiyotni tiklash manbalari qatorida bosh vazir xalqaro grantlar, xalqaro moliya institutlarining imtiyozli kreditlari, xususiy sektor investitsiyalari hamda jismoniy va yuridik shaxslarning byudjetdan tashqari ajratmalarini qayd etdi. Mamlakat tiklanishining yana bir manbayi Ukrainaning o‘z budjeti bo‘ladi.
Izoh (0)