Украинанинг Россия қўшинлари томонидан босиб олинган Херсон вилояти ҳудудида Instagram ва YouTube блокланди. Бу ҳақда истелодан кейин Херсон вилояти ҳарбий-фуқаролик маъмурияти матбуот котиби этиб тайинланган Сергей Мороз маълум қилди.
«Бизда бир неча кун олдин YouTube’ни ўчириб қўйишди. Ундан фақат VPN ёрдамида фойдаланишигиз керак. Шунинг учун, албатта, биз ҳозир YouTube’сиз, Instagram’сиз яшаяпмиз. Лекин ҳаммаси жойида, амаллаяпмиз, бу нормал ҳолат », — деди Мороз ўзининг Telegram каналидаги видеомурожаатида.
Херсон вилоятида YouTube блоклангани ҳақида аввалроқ маҳаллий «Кавун.City» нашри ва Украинанинг «24-канал»и разведка манбаларига таяниб хабар берган эди. Шунингдек, хабарларга кўра, ҳудудда Viber мессенжери ҳам ишламаяпти.
Май ойи бошида Херсон вилоятининг «янги ҳокимияти» яқин орада Instagram, Facebook ва «минтақадаги вазиятни беқарорлаштиришга қаратилган бошқа гуруҳлар» блокланишини маълум қилганди.
Май ойининг охирига келиб, Херсон вилояти ва Запорожье вилоятининг босиб олинган қисмида Украина провайдерларининг мобил алоқаси ва интернети ўчирилди. Украина Махсус алоқа ва ахборотни ҳимоя қилиш давлат хизмати буни минтақадаги Россия томонидан тайинланган ҳокимиятлар амалга оширганини айтган, улар эса ўз навбатида блокланишда Украина томонини айблаган.
Изоҳ (0)