Евро долларга нисбатан 20 йиллик энг паст даражага тушди

5 июлда евро долларга нисбатан 20 йилликдаги энг паст даражага тушиб кетди. Бу ҳақда Reuters хабар бермоқда.

Бунга сабаб эса табиий газ нархининг кўтарилиши Европа иқтисодиёти ҳақида хавотирларни кучайтиргани ва июнь ойида минтақадаги бизнес ўсиши кескин секинлашганидир.

Евро долларга нисбатан 1,3 фоизга тушиб, 1 евро учун 1,0281 долларни ташкил этди. Бу эса 2002 йилнинг декабридан бери энг заиф кўрсаткич.

Валюта Швейцария франкига нисбатан 0,9 фоизга тушиб, 1 евро учун 0,9925 франкни ташкил этди. Бу 2015 йилдан бери энг паст кўрсаткичдир.

Доллар индекси 1,1 фоизга кўтарилиб, 106,24 ни ташкил этди. Бу валюта учун икки ўн йилликнинг энг юқори кўрсаткичидир.

Ўтган йилдан бери инфляция глобал мавзу бўлиб келмоқда. Иқтисодий ўсиш суръати эса жорий йилнинг 2-чорагида сезиларли даражада ёмонлашди.

Аввалроқ евронинг сўмга нисбатан қиймати маълум бўлган эди.