Россия президенти Владимир Путин бу йил АҚШ мустақиллиги куни муносабати билан табрик телеграммасини жўнатмайди. Бу ҳақда давлат раҳбарининг матбуот котиби Дмитрий Песков маълум қилди, деб ёзади «РБК».
«Бу шу билан боғлиқки, бу йил АҚШ томонидан душманларча сиёсат авж нуқтасига чиқди», — дея аниқлик киритди у. Кремль фикрича, бундай шароитларда табрик хатини юбориш «мақсадга мувофиқ деб ҳисобланиши амри маҳол».
АҚШ мустақиллиги куни бугун, 4 июль куни нишонланади. Ўтган йили Кремль президентнинг америкалик ҳамкасби Жо Байденга ушбу байрам муносабати билан қутлов телеграммаси юборгани ҳақида хабар бермаган эди. 2020 йилда Путин ўша вақтдаги АҚШ президенти Дональд Трампни табриклаган, аммо телеграмма Кремль сайтида эълон қилинмаган эди.
Москва ва Вашингтон ўртасидаги алоқалар Россиянинг Украинадаги ҳарбий операцияси бошланганидан кейин ёмонлашди. Россиянинг АҚШдаги элчиси Анатолий Антонов июнда икки мамлакат ўртасидаги «сўнгги бир неча йиллар давомида чуқур инқирозда бўлган» муносабатлар кескин нуқтага чиққанини, сиёсий мулоқот эса боши берк кўчага кириб қолганини айтди. Дипломат бунда Америка томонини айблади.
Россия Ташқи ишлар вазирлиги март ойида Россия ва АҚШ алоқалари узилиш арафасида турганини, воқеалар ривожи эса Вашингтоннинг хулқига боғлиқ бўлишини маълум қилганди.
АҚШнинг Россиядаги элчиси Жон Салливан июнда мамлакатлар дипломатик алоқаларни тўлиқ узиб, «бир-бири билан гаплашмай қўйиши» мумкинлигини айтди.
Изоҳ (0)