Rossiya prezidenti Vladimir Putin bu yil AQSH mustaqilligi kuni munosabati bilan tabrik telegrammasini jo‘natmaydi. Bu haqda davlat rahbarining matbuot kotibi Dmitriy Peskov ma’lum qildi, deb yozadi “RBK”.
“Bu shu bilan bog‘liqki, bu yil AQSH tomonidan dushmanlarcha siyosat avj nuqtasiga chiqdi”, — deya aniqlik kiritdi u. Kreml fikricha, bunday sharoitlarda tabrik xatini yuborish “maqsadga muvofiq deb hisoblanishi amri mahol”.
AQSH mustaqilligi kuni bugun, 4-iyul kuni nishonlanadi. O‘tgan yili Kreml prezidentning amerikalik hamkasbi Jo Baydenga ushbu bayram munosabati bilan qutlov telegrammasi yuborgani haqida xabar bermagan edi. 2020-yilda Putin o‘sha vaqtdagi AQSH prezidenti Donald Trampni tabriklagan, ammo telegramma Kreml saytida e’lon qilinmagan edi.
Moskva va Vashington o‘rtasidagi aloqalar Rossiyaning Ukrainadagi harbiy operatsiyasi boshlanganidan keyin yomonlashdi. Rossiyaning AQSHdagi elchisi Anatoliy Antonov iyunda ikki mamlakat o‘rtasidagi “so‘nggi bir necha yillar davomida chuqur inqirozda bo‘lgan” munosabatlar keskin nuqtaga chiqqanini, siyosiy muloqot esa boshi berk ko‘chaga kirib qolganini aytdi. Diplomat bunda Amerika tomonini aybladi.
Rossiya Tashqi ishlar vazirligi mart oyida Rossiya va AQSH aloqalari uzilish arafasida turganini, voqealar rivoji esa Vashingtonning xulqiga bog‘liq bo‘lishini ma’lum qilgandi.
AQSHning Rossiyadagi elchisi Jon Sallivan iyunda mamlakatlar diplomatik aloqalarni to‘liq uzib, “bir-biri bilan gaplashmay qo‘yishi” mumkinligini aytdi.
Izoh (0)