Миср ҳукумати акулаларнинг сайёҳларга ҳужумидан сўнг бир нечта пляжни ёпди

Миср ҳукумати икки сайёҳнинг акула ҳужуми оқибатида ҳалок бўлиши ортидан Қизил денгиз соҳилидаги бир нечта пляжларни ёпди. Бу ҳақда Tengrinews хабар берди.

Мисрнинг Хургада туманида акула ҳужумидан иккинчи аёл ҳалок бўлгани ҳақида маълум бўлгач, Қизил денгиз провинцияси губернатори генерал майор Амр Ҳанафий тумандаги айрим пляжларни ёпишга қарор қилди.

Атроф-муҳит вазирлиги баёнотида айтилишича, ҳужум ҳолатлари ва уларнинг сабабларини ўрганиш учун қўмита тузилган.

Эслатиб ўтамиз, 3 июль куни Хургада курорт шаҳрида акула сайёҳга ҳужум қилган эди. Оқибатда у вафот этган. Аввалроқ шу ҳудудда Австриянинг 68 ёшли фуқароси вафот этгани ҳақида хабар берилганди. Акула ҳужумидан у танасининг бир қисмини йўқотган. У қирғоққа чиқарилган ва шок ҳолатида касалхонага юборилган. Шифокорларнинг уринишларига қарамай, аёл вафот этган.