Оқ уй миллий хавфсизлик кенгашининг стратегик коммуникациялар бўйича координатори Жон Кирби Украина президенти Владимир Зеленский ҳали мамлакатдаги урушда ғалаба шартларини муҳокама қилишга эрта деб ҳисоблаётгани ҳақида гапирди. Бу ҳақда «Коммерсантъ» хабар берган.
«Президент Владимир Зеленский ғалаба қандай ва қайси шартлар асосида белгиланишини ҳал этиши мумкин. Биз унинг жанг майдонида бу ишни қилиши ва музокаралар столида ҳам муваффақиятга эришишини таъминламоқчимиз. Лекин менимча Зеленскийнинг ўзи ҳам ҳали бу ҳақда гапиришга анча эрта эканини айтса керак»,— деган Кирби Fox News телеканали эфирида («ТАСС» иқтибоси).
Унинг қўшимча қилишича, Россия раҳбарияти музокаралар олиб боришдан манфаатдор эмаслигини кўрсатмоқда.
Россия ҳамда Украина ўртасида урушни тўхтатиш юзасидан музокараларнинг охирги раунди 29 март куни Истанбулда бўлиб ўтганди. Мазкур музокаралардан кейин Россия мудофаа вазирлиги Киевдан қўшинларини олиб чиқиб кетишини эълон қилди. 17 май куни Украина президенти офиси раҳбари Михаил Подоляк Москва ва Киев ўртасидаги музокаралар Украинанинг ташаббуси билан тўхтатилганини билдирган.
Изоҳ (0)