Ливия Миллий Армияси (ЛМА) халқ талабларини тўлиқ қўллаб-қувватлашини ва инқироз шароитида уларни қонуний деб ҳисоблашини билдирди. Бу ҳақда Sada El Balada хабар берди.
Шу билан бирга, ЛМА вакиллари халқни давлат ва хусусий объектларга зарар етказмасликка чақирди. Уларнинг ишонтириб айтишича, армия халқ ҳафсаласини пир қилмайди, уларни шантажлар олдида ожиз қолдирмайди ва ҳимоя қилади.
Ливия армияси агар мамлакат ташқаридан халқ ҳаракатига таъсир ўтказишга уринишлар кузатилса, Ливия мустақиллигини сақлаб қолиш учун зарур чораларни кўришини тасдиқлади.
2 июль куни Ливияда норозилик намойишлари бўлиб ўтди. Намойишчилар маҳаллий ҳокимиятларни тарқатиб юбориш, сайловлар ўтказиш ва электр таъминоти муаммосини ҳал қилишни талаб қилди. Мамлакат шарқидаги Тобрук шаҳрида намойишчилар парламент биносини штурм билан эгаллаб, ёқиб юборди.
Сиёсий беқарорлик Ливияда 2011 йилда Муаммар Қаддафий ҳокимиятдан ағдарилиб, ўлдирилганидан буён кузатилмоқда. Мамлакатда ягона бошқарув органини шакллантиришга эришилмади, оқибатда турли гуруҳлар орасида қуролли низо, кейинчалик эса халқаро тан олинган муваққат ҳукумат ва генерал Халиф Хафтар раҳбарлигидаги Ливия миллий армияси ўртасида фуқаролар уруши келиб чиқди.
2020 йилда халқаро ҳамжамият иштирокидаги музокаралар йўли билан қўшма ҳарбий комиссия тузилди, у ерга низо томонлари кирди ва улар бутун Ливия ҳудудида ўт очишни тўхтатишга келишиб олди.
10 февраль куни қонун чиқарувчилар миллий бирлик ҳукумати мандати декабрь охирида тугади деб ҳисоблаб, Фатхи Башагини янги бош вазир этиб сайлади, 3 март куни унинг ҳукумати қасамёд қабул қилди. Бундан аввалги бош вазир Абдул Дбейба лавозимдан кетишдан бош тортмоқда, унинг фикрича, фақат унинг вазирлар маҳкамасигина сайловларга тайёргарликни амалга ошириш ваколатига эга. У лавозимни фақат қонуний сайланган давомчисига беришини таъкидламоқда.
Изоҳ (0)