Liviya Milliy Armiyasi (LMA) xalq talablarini to‘liq qo‘llab-quvvatlashini va inqiroz sharoitida ularni qonuniy deb hisoblashini bildirdi. Bu haqda Sada El Balada xabar berdi.
Shu bilan birga, LMA vakillari xalqni davlat va xususiy obyektlarga zarar yetkazmaslikka chaqirdi. Ularning ishontirib aytishicha, armiya xalq hafsalasini pir qilmaydi, ularni shantajlar oldida ojiz qoldirmaydi va himoya qiladi.
Liviya armiyasi agar mamlakat tashqaridan xalq harakatiga ta’sir o‘tkazishga urinishlar kuzatilsa, Liviya mustaqilligini saqlab qolish uchun zarur choralarni ko‘rishini tasdiqladi.
2-iyul kuni Liviyada norozilik namoyishlari bo‘lib o‘tdi. Namoyishchilar mahalliy hokimiyatlarni tarqatib yuborish, saylovlar o‘tkazish va elektr ta’minoti muammosini hal qilishni talab qildi. Mamlakat sharqidagi Tobruk shahrida namoyishchilar parlament binosini shturm bilan egallab, yoqib yubordi.
Siyosiy beqarorlik Liviyada 2011-yilda Muammar Qaddafiy hokimiyatdan ag‘darilib, o‘ldirilganidan buyon kuzatilmoqda. Mamlakatda yagona boshqaruv organini shakllantirishga erishilmadi, oqibatda turli guruhlar orasida qurolli nizo, keyinchalik esa xalqaro tan olingan muvaqqat hukumat va general Xalif Xaftar rahbarligidagi Liviya milliy armiyasi o‘rtasida fuqarolar urushi kelib chiqdi.
2020-yilda xalqaro hamjamiyat ishtirokidagi muzokaralar yo‘li bilan qo‘shma harbiy komissiya tuzildi, u yerga nizo tomonlari kirdi va ular butun Liviya hududida o‘t ochishni to‘xtatishga kelishib oldi.
10-fevral kuni qonun chiqaruvchilar milliy birlik hukumati mandati dekabr oxirida tugadi deb hisoblab, Fatxi Bashagini yangi bosh vazir etib sayladi, 3-mart kuni uning hukumati qasamyod qabul qildi. Bundan avvalgi bosh vazir Abdul Dbeyba lavozimdan ketishdan bosh tortmoqda, uning fikricha, faqat uning vazirlar mahkamasigina saylovlarga tayyorgarlikni amalga oshirish vakolatiga ega. U lavozimni faqat qonuniy saylangan davomchisiga berishini ta’kidlamoqda.
Izoh (0)