Финляндиянинг Россия билан чегараси яқинидаги Жанубий Карелия провинциясининг Лаппеенранта шаҳри ўз аэропортига НАТО базасини жойлаштиришни таклиф қилишга тайёр. Бу ҳақда шаҳар мэри Киммо Ярва маълум қилди.
«Агар қуролли кучлар хоҳласа, албатта бунинг имкони бўлади», — деди шаҳар раҳбари ва бу соҳада мутахассис бўлмагани учун ҳарбийларни қаерга жойлаштиришни белгилай олмаслигини таъкидлади.
Ярванинг қўшимча қилишича, Финляндиянинг НАТОга аъзо бўлиш истиқболи Жанубий Карелияга, жумладан, чегара провинциясида ишлашга тайёр бўлган компаниялар учун умид ва хавфсизлик ҳиссини беради. Мэрнинг сўзларига кўра, шаҳарда НАТО базасини яратиш бўйича муҳокамалар Финляндия альянсга қўшилиш ҳақида гапираётган пайтдаёқ бошланган.
Финляндия ва Швеция Россиянинг Украинадаги босқини бошланганидан кейин НАТОга кириш истагини билдирди ва май ойида ариза топширди. Уларни қабул қилиш учун НАТОга аъзо барча 30 давлатнинг қўллаб-қувватлови зарур, бироқ Туркия бунга қарши чиқди: у икки давлатни ўз ҳудудида Анқара томонидан тан олинган террорчи Курдистон Ишчилар партияси аъзоларини яширганликда айблади.
28—30 июнь кунлари Мадридда бўлиб ўтган НАТО саммити арафасида уч давлат муросага эришди ва Туркия вето ҳуқуқидан воз кечди, Стокгольм ва Хелсинки расман НАТОга таклиф қилинган давлатлар мақомини олди. Энди уларнинг альянсга кириши иштирокчи мамлакатлар парламентлари томонидан тасдиқланиши керак.
Россия президенти Владимир Путин Швеция ва Финляндиянинг НАТОга кириши Москва хавотирига сабаб бўлмаслигини айтган. Аммо у бундан Россияга таҳдидлар пайдо бўлган тақдирда мамлакат зудлик билан жавоб қайтаришни айтган.
Изоҳ (0)