Александр Лукашенко Украина Қуролли кучларини Беларусдаги ҳарбий объектларга ракета учираётганликда айблади. Бир неча кун олдин ўққа тутишга уриниш бўлган, бироқ барча ракеталар тутиб олинган, деди у мамлакат Мустақиллик куни муносабати билан ўтказилган тантанали йиғилишда.
«Бизни провокация қилишяпти... Уч кун олдин, балки ундан аввалроқ, улар Украина ҳудудидан Беларусь ҳудудидаги ҳарбий объектларга зарба беришга ҳаракат қилди. Аммо, хайриятки, ‘Панцир’ зенит тизимлари Украина Қуролли кучлари томонидан учирилган барча ракеталарни тутиб олишга муваффақ бўлди», — деди Лукашенко. У сўзлари учун ҳеч қандай далил келтирмади.
Лукашенконинг таъкидлашича, у Беларусь ҳарбийларига Минск рақибларининг пойтахтларидаги қарор қабул қилиш марказларини «нишонга олиш» буйруғини берган. Лукашенко агар улар Гомелга, Мозир нефтни қайта ишлаш заводига, Лунинц аэродромига ёки Брестга зарба беришга журъат этса, «бир зумда жавоб қайтарилади», деб огоҳлантирди.
«Бизда жавоб бор. Мен бунга узоқ вақтдан бери тайёргарлик кўрдим. Эсингизда бўлса, мен ‘Полонезлар», ракета ишлаб чиқариш ва ҳоказолар ҳақида айтгандим. Сиз (Минскнинг рақиблари) бутунлай ушбу ракеталар ҳужуми остидасиз. Мен идораларда ёки саройларда ким ўтирганига қараб ўтирмайман», — деди у.
Ғарб давлатлари Россиянинг Украинага бостириб киришини қўллаб-қувватлагани учун Беларусга қарши санкциялар киритган эди. Лукашенконинг таъкидлашича, Беларусь ҳарбийлари Россиянинг «махсус операциясида» қатнашаётгани йўқ.
Изоҳ (0)