“Otasiz, uysiz yashash oson emas”. Millati tojik, Qozog‘iston fuqarosi bo‘lgan o‘zbekistonlik bloger Azoda bilan suhbat (foto)

Keyingi paytlarda san’atda yangi sahifa ochilganga o‘xshaydi. Internet yulduzlari: vayner va blogerlar xuddi san’atkorlar kabi xalq orasida mashhur. Ular kichik ijodi orqali millionlab kuzatuvchilarga ega. Ana shunday blogerlardan biri Azodaning Instagram sahifasini ham bir million obunachi kuzatadi. “Daryo” muxbiri Nargizaxon Murodova Azoda bilan intervyu tashkillashtirdi.

Millati tojik, Qozog‘iston fuqarosi bo‘lgan o‘zbekistonlik bloger

—  Qozog‘istonda “o” harfni boshqacha talaffuz qilinadi. Meni O‘zoda deb chaqirishlari yoqmagani uchun ismimni Azodaga o‘zgartirishga qaror qilganman. Toshkentga kelib, san’at yo‘lini tanlaganimdan keyin ham xuddi shu ismni saqlab qolishni istadim. Chunki o‘zbek san’atida Ozoda ismli mashhur xonanda bor.Millatim tojik, 2020-yilgacha Qozog‘istonda yashaganmiz. Ammo bolalikdan o‘zbek tili va urf-odatlariga qiziqish kuchli bo‘lgan. Shu bois O‘zbekistonda ijod qilishni taklif qilishganda, jon deb rozi bo‘lganman.

Klipga ko‘chgan hayot

— Bolaligimda dadam bilan onam oilaviy kelishmovchilik sabab ajrashib ketishgan. Uchta bolani yolg‘iz tarbiyalash va boqish onamga oson kechmagan. Dadam esa yangi oila qurib, o‘zi bilan o‘zi ovora bo‘lib ketgan. 2012-yil oilamiz uchun nihoyatda og‘ir kelgan. Onamni gap-so‘zlar, tazyiqlar ezib qo‘ygan. O‘shanda onamni hech kim eshitmagan.Onamning qiynalayotganini ko‘rib, 12 yoshimdan unga yordamlashishga harakat qilganman. Bosh farzand baribir ota-onaga ko‘makdosh bo‘larkan. Biz shahardan chekkaroq joyda yashardik. Shu bois onam bilan tong saharda turib, markazga ishlash uchun kelardik. Fastfud yeguliklari va non sotadigan yerda ishlaganmiz. Tushgacha ishlab, keyin maktabga ketardim.

Bolaligimdagi eng katta qiyinchilik uysizlik bilan bog‘liq. Haqiqatan ham u yerda uyimiz yo‘q edi. Ijara uyda yashash oson emas. Ammo u kunlarni qiyinchilik degim kelmaydi, chunki uyimiz bo‘lmagani bilan juda baxtli edik. Onam kamtarona bo‘lsa-da, baxtli oila muhitini yaratib bergan.

Dadam haqida ko‘p so‘rashadi. Ammo shaxsiy hayotim haqida gapirgim kelmaydi. 12 yoshimda dadamdan qattiq ranjigandim. Onamning yonini olaverganim uchun jahl ustida menga “Sendek qizim yo‘q”, degan gapni aytgan. Bu gap ko‘nglimga juda og‘ir botgan.

Uni san’at kollejiga qabul qilishmagan

— Maktabni tamomlagan yilim ham Toshkentga kelganman. Estrada sirk kollejining aktyorlik bo‘limiga hujjat topshirmoqchi bo‘lganman. Ammo hujjatlarimni qabul qilishmagan.Rostini aytsam, yaqinlarim ham san’atkor bo‘lishimga qarshi bo‘lgan. Qizlar uchun eng yaxshi mutaxassislik o‘qituvchilik deyishgan. Shundan keyin Qozog‘istondagi kollejda boshlang‘ich sinf o‘qituvchiligi mutaxassisligi bo‘yicha o‘qiganman. Ammo institutda o‘qishga imkonim bo‘lmagan. Lekin bir muddat maktabda o‘qituvchilik qilganman.

Unga omad O‘zbekistonda kulib boqdi

— Ko‘pchilik meni tiktoker deb biladi. Ammo 2017-yil blogerlikni boshlaganimda hali tiktok yaratilmagandi. Men asosan qozoq yoshlari bilan “KVN”larda ishtirok etardim. Ijtimoiy tarmoqlar uchun ham vaynlar olardim. Qozoq tilida bo‘lgani uchun o‘zbek kuzatuvchilari ularni ko‘rmagan bo‘lishlari tabiiy hol.2019-yil komik aktrisa Shahlo Zoirovani parodiya qilib, videoni Instagram’ga joylaganman. Ana shu video sabab omadim kelgan. Instagram’da o‘zbek kuzatuvchilarim soni ortganidan keyin O‘zbekistonga taklif etishgan. Uzoq oilaviy bahsdan so‘ng 2020-yilning 16-dekabr kuni O‘zbekistonga kelganman. Oilasidan uzoqda yashash juda qiyin. O‘shanda uydagilarni ham bu yerga olib kelaman, ukam bilan singlimni o‘qitaman, deb niyat qilgandim. Niyatimga yetdim.

Firibgarlar uyning pulini “uxlatishgan”

— Yuqorida ijara uyda yashaganimizni aytib o‘tdim. Onam uy sotib olishimiz uchun Janubiy Koreyaga ishlagani ketgandi. Avval ham ishlagan pullarimizni to‘plab uy olmoqchi bo‘lganmiz. Ammo firibgar onamni chuv tushurib ketgan. Katta puldan ayrilganimiz oilamiz uchun stress bo‘lgan. Xullas, 2021-yil omadli keldi. Ishlagan pullarimni to‘plab onam uchun uy sotib oldim. Onamga qo‘ng‘iroq qilib, aytganimda quvonib ketdi.

Bloger, aktrisa va endi xonanda

— Ilgari O‘zbekiston davlat konservatoriyasida o‘qishni istardim. Hozir bunga xohishim yo‘q. O‘qimoqchiman, ammo boshqa mutaxassislikni egallash niyatidaman. Menimcha, yaxshi aktyorga shogird tushib, aktyorlik sirlarini o‘rgansa bo‘ladi. Amaliyot esa ijodkorni pishitadi. Qo‘shiq aytishga bolaligimdan qiziqaman. Ammo bu bo‘yicha ham malakamni oshirishim kerak. Hozircha qo‘shiqlarim ko‘p emas. Ammo xalq talabi bilan xizmatlarda ishtirok etyapman.

Azodaning Ozodda ko‘ngli bormi?

— “Ozod Xurramovni sevasizmi?” degan savolni ko‘p berishadi. U yigitni taniganimda ikkimizning ham Instagram'dagi obunachilarimiz deyarli “o”ga teng edi. U bilan ijtimoiy tarmoq orqali tanishganmiz. Ammo shuncha yil davomida o‘rtamizda do‘stlikdan boshqa rishta bo‘lmagan. Hayotimiz bir-biriga o‘xshab ketadi, u ham katta qiyinchiliklar bilan bugungi darajaga erishgan. Uni hurmat qilaman, nafaqat ijodi bilan balki insoniyligi bilan ham men uchun qadrli.