Хитойнинг Россияга экспорти февраль охиридан май ойи охиригача 2021 йилнинг иккинчи ярмига нисбатан 38 фоизга камайди. Бироқ айни вақтда Россиядан импорт кескин ошди ва рекорд даражадаги 10,3 млрд долларга етди.
Бундай маълумотлар Петерсон Жаҳон иқтисодиёти институти (PIIE)нинг воқеалар муносабати билан Россияга нисбатан жорий этилган санкциялар самарадорлигига доир тадқиқотида келтирилган.
PIIE мутахассислари 2021 йилда Россия импортининг деярли 90 фоизини ташкил этган дунёнинг 54 мамлакати бўйича маълумотларни таҳлил қилди.
Тадқиқотда қайд этилганидек, 24 февралдан 30 апрелгача бўлган даврда турли мамлакатлардан Россияга экспорт ҳажми кескин камайди.
PIIE ҳисоб-китобларига кўра, ушбу даврда унга нисбатан санкциялар қўйган мамлакатлардан Россияга экспорт 60 фоизга камайди.
Санкциялар қўлламаган мамлакатлардан бу кўрсаткич тахминан 40 фоиз.
Ушбу давр мобайнида 54 мамлакатдан фақат 3 тасида февраль ойининг охиридан бошлаб камида бир ой давомида Россияга экспорт ҳажми ўсди. Бу уч давлат — Исроил, Ўзбекистон ва Бразилия.
Институт Хитой ҳақидаги маълумотларни май ойининг охиригача таҳлил қилди. Хитойнинг Россияга экспорти 73 миллиард долларни ташкил этган.
Февраль ойида, PIIE қайд этишича, Хитой Россия билан нормал иқтисодий муносабатларни сақлаб қолишда давом этишини айтди. Май ойининг охирига келиб эса, Хитой маҳсулотларининг Россияга экспорти кескин камайди.
Бироқ Хитой Россия билан савдо-сотиқдан бутунлай воз кечмаяпти ва унинг Россиядан импорти рекордларни янгиламоқда. Шу билан бирга, ушбу импортнинг деярли 80 фоизи нефть ва газдир.
Изоҳ (0)