San’atkorlar bilan bo‘lgan suhbatlarda “Har bir qo‘shiq o‘z omadi bilan yaratiladi”, degan gapni ko‘p eshitamiz. Bu gapda ham jon bor. Chunki kutilmaganda qo‘shiq millionlab tinglovchilarga ma’qul bo‘lishi, oddiy xonandani yulduz darajasiga olib chiqishi mumkin. Qisqasini aytganda, qo‘shiq kimga omad keltirishini taxmin qilib bo‘lmaydi.
“Uylanamiz”
“Uylanamiz” she’ri 1993-yili xonanda Yahyobek Mo‘minov taklifi bilan farg‘onalik shoir Erkin Yo‘ldosh tomonidan yozilgan. Xonanda Yahyobek Mo‘minov she’rga musiqa bastalab, uni ko‘plab tadbirlar va to‘y-hashamlarda ijro etgan.— Bu she’r ham do‘stim, ham sinfdoshim Erkin Yo‘ldosh tomonidan yozilgan. Mazkur tarona akasi uylangan ukalarning “dardi” hisoblanadi, — deydi Yahyobek Yo‘ldoshev.
Xalqimizga “Qaramaysiz” duyeti bilan yaxshi tanish bo‘lgan xonanda Mirodil Hakimov “Uylanamiz” qo‘shiqni 1997-yili qaytadan ijro etgan. O‘sha yillari qo‘shiqqa ishlangan klip ham ekranlarda namoyish etilgan.Ammo shoir bu xonandadan norozi. U mualliflik huquqi toptalgani ta’kidlab, Adliya boshqarmasidan xonandaga nisbatan qonunchilikda mavjud jazo choralari ko‘rilishini so‘rab, murojaat qilgan.
Bir yil avval Dostonbek Ergashev mazkur qo‘shiqni сover uslubida ijro etdi. Uning ijrosi ko‘pchilikka ma’qul bo‘ldi. Oradan hech qancha vaqt o‘tmay xonanda qo‘shiqni “Bojalar” guruhi bilan duyet tarzida ijro etdi. YouTube tarmog‘iga joylangan qo‘shiq shu kungacha 6 million marta tomosha qilindi.
“O‘ylamadim”
Eski qo‘shiqlarni yangilab aytishga usta Doston Ergashev “O‘ylamadim” qo‘shig‘idan ham unumli foydalangan. Aslida mazkur qo‘shiq 1993-yili qashqadaryolik xonanda O‘ktam Aliyev tomonidan yaratilgan.
— Bu qo‘shiqni chiroqchilik Ulug‘bek baxshi Abrayev bilan hamkorlikda yaratganmiz. U insonni avvaldan hurmat qilardim. 1993-yili davlat tadbirida uchrashib qolganmiz va undan qo‘shiq yaratib berishini so‘raganman. 2012-yili Chiroqchida qo‘shiqqa klip ham olganmiz, — deydi xonanda O‘ktam Aliyev.
“O‘ylamadim” taronasini O‘ktam Aliyevdan ruxsat so‘rab Dilshod Rahmonov, Abdujalil Qo‘qonov va Vohidjon Isoqovlar ham ijro etgan. Faqat ularning ijrosidagi qo‘shiqlar faqatgina to‘y-xizmatlari repertuariga kiritilgan.
Doston Ergashev ham mazkur qo‘shiqni ijro etgan va unga klip suratga olgan. “Qo‘shiqni bir oy davomida o‘ylab yaratdim”, degan jumla O‘ktam Aliyevni ranjitgan va ikki ijodkor o‘rtasida nizo yuzaga kelgan. Ammo tan olish kerak, Doston Ergashev ijrosi avvalgilariga nisbatan omadliroq chiqdi.
“Jiyda gulim”
2010-yili yosh xonanda Afsona “Jiyda gulim” qo‘shig‘ini ijro etgan. Mazkur tarona Shahlo Ahrorova she’ri va Musaxon Nurmatov musiqasi asosida yaratilgan. Xonanda to‘rt yildan so‘ng unga klip suratga olgan.
Ammo undan avval xonanda Ozodbek Nazarbekov o‘zining “Ozod shou” ko‘rsatuvida mazkur qo‘shiqni Afsona bilan duyet tarzida ijro etgan. Shundan so‘ng uni yakka holda ijro etgan. Ozodbek Nazarbekovning ijrosi ko‘pchilikka ma’qul kelgan.
“Atirgullar ochdi chiroy”
“Atirgullar ochdi chiroy” qo‘shig‘i 1994—1996-yillarda suratga olingan “Masxaraboz” filmi uchun yaratilgan. Qo‘shiq she’ri Azim Suyunga, musiqasi esa Mirhalil Mahmudovga tegishli. Saundtrekni Kozim Qayumov va Zaynab Mirzatillayevalar ijro etgan. Qo‘shiq film tomoshabinlarida iliq tassurot qoldirgan.
Yangi talqindagi qo‘shiq 2016-yili yosh xonanda Dilnoza Akbarova va Jasurbek Jabborov tomonidan ijro etilgan. Qo‘shiq klipi YouTube tarmog‘ida 25 million marta tomosha qilingan. Qo‘shiqning yangicha talqini avvalgisiga nisbatan tinglovchilarga ma’qul kelgan.
“Dadamning soyasida”
Xonanda Baxtiyor G‘oziyev “Dadamning soyasida” qo‘shig‘ini avval ijro etganini, qo‘shiq she’ri Xurshid Karim qalamiga mansub ekanini ta’kidlaydi. Ammo tinglovchilar Tiktok tarmog‘ida tarqalgan video sabab qo‘shiq Jaloliddin Ahmadaliyevga tegishli deb o‘ylaydi.
Bu mojarolar sabab Jaloliddin Ahmadaliyev YouTube’dagi rasmiy sahifasiga ijrosidagi qo‘shiqni joylamagan. Bilishimizcha, qo‘shiqni faqatgina xalq xizmatlarida kuylaydi, xolos.
Izoh (0)