Португалиялик олимлар маймунчечак вирусининг мутация тезлигини ҳисоблаб чиқди, деб ёзади «Интерфакс».
Рикардо Хорхе номидаги Саломатлик миллий институти ва Лусофона университети олимлари 15 нафар бемордан олинган вирус намуналарини генетик тадқиқ қилди.
Уларнинг аниқлашича, вирус кутилганидан 6—12 марта каттароқ тезлик билан мутацияга учраган. Тадқиқотчилар тахмин қилишича, вирус мутациясининг тўсатдан тезлашиши вирус одамларга юқишнинг янги усулини ишлаб чиққанидан дарак бериши мумкин — айни вақтда у одамдан одамга очиқ яралар билан яқин алоқада, организмдаги суюқликлар орқали ёки ҳаво-томчи йўли билан юқади, деб ҳисобланилади.
Таъкидланишича, аввалги тадқиқотлар маймунчечак каби вируслар одатда йилига бир ёки икки марта мутацияга учрашини кўрсатган эди.
Олимлар фикрича, баъзи мутациялар одам иммун тизими, хусусан, вирусларни ўлдириб, генетик коддан нусха олишда хатоликларни келтириб чиқарувчи APOBEC3 туридаги ферментлар таъсирида юзага келган бўлиши мумкин.
«Агар баъзи вируслар бундай ҳужумни бошидан ўтказиб ўз генларини узатган бўлса, улар вирусларнинг келажак авлодларига одам иммун тизими қаршисида устунлик берган бўларди. Бу эса вирус нима сабабдан кутилганидан кўра тезроқ мутацияга учрашини тушунтириши мумкин», — дейилади Medical Xpress порталида.
Тадқиқотчилар тахмин қилишича, вирус баъзи мамлакатларда одамлар ва ҳайвонлар орасида паст концентрацияларда айланган. Шунингдек, улар қайд этишича, эволюциянинг тезлашган суръати 2017 йилда маймунчечак авж олишига қарши кўрилган чораларга жавоб бўлиши мумкин.
Маймунчечак — худди чечак туридаги каби икки занжирли ДНК-вирус бўлиб, 1950 йилларда кашф қилинган, у асосан Африка қитъасида тарқалади. Ўз номига қарамасдан, вирус маймунлардан кўра кўпроқ кемирувчиларда учрайди. Бундан олдинги тадқиқотлар маймунчечакнинг Ғарбий Африка ва Конго дарёси ҳавзасига тегишли иккита асосий тури борлигини кўрсатганди. Биринчиси камроқ ўлим келтирувчи бўлиб, айни пайтгача Африкадан ташқарида бир неча минг кишига юққан.
Изоҳ (0)