2022 йил бошидан буён маймунчечак билан касалланиш бўйича 3413 та ҳолат лаборатория тасдиғини топган, касалликда битта ўлим ҳолати маълум. Бу ҳақда Жаҳон соғлиқни сақлаш ташкилоти (ЖССТ) ҳисоботида қайд этилган.
2022 йилнинг 1 январидан 22 июнига қадар ЖССТга 50 та давлатдан 3413 та касалланиш ҳолати ва битта ўлим ҳақида хабар келиб тушган. Жумладан, 17 июндан бери 1310 та янги ҳолат қайд этилган ва яна саккизта давлатда касаллик аниқланган.
Лаборатория томонидан тасдиқланган ҳолатларнинг аксарияти Европа минтақасида қайд этилган (жами ҳолатларнинг 86 фоизи — 2933 киши). Касаллик қайд этилган бошқа ҳудудларга қуйидагилар киради: Африка минтақаси (2 фоиз - 73 ҳолат), Америка (11 фоиз — 381 киши), Шарқий Ўрта Ер денгизи минтақаси (бир фоиздан кам — 15 киши) ва Ғарбий Тинч океани минтақаси (бир фоиздан кам — 11 бемор). 2022 йилнинг иккинчи чорагида Нигерияда битта ўлим қайд этилди.
Шунга қарамай ЖССТ Фавқулодда вазиятлар қўмитаси маймунчечак эпидемиясини ҳозирда халқаро аҳамиятга молик бўлган фавқулодда ҳолат (PHEIC) деб тан олмади ва пандемия эълон қилиниши шарт эмас, деган қарорга келди.
Изоҳ (0)