Швейцария федерал жиноий суди Credit Suisse банкини Болгариянинг кокаин савдоси билан шуғулланган жиноий гуруҳининг пул ювишига алоқадор деб топди, деб ёзади «РБК».
Reuters қайд этишича, бу банкка нисбатан мамлакатдаги биринчи жиноий ишдир. Тергов 2004 йилдан 2008 йилгача бўлган давр воқеаларига тааллуқли.
Суд Credit Suisse’ни 2 миллион Швейцария франки (2,1 миллион доллар) миқдорида жаримага тортди, жиноий гуруҳ аъзолари ҳисобларда сақлаган 12 миллион доллардан зиёд қийматга эга активларни мусодара қилишни буюрди, шунингдек, банкка Швейцария ҳукуматига товон пули сифатида 18,6 миллион евро тўлаш мажбуриятини юклади.
Пул ювишда айбдор деб топилган собиқ банк ходимаси 20 ойга озодликдан маҳрум этишга ва жаримага ҳукм қилинди. Financial Times ёзишича, у болгариялик собиқ теннисчи Елена Пампулова-Бергоми бўлиб, у Credit Suisse’да жамоатчилик билан алоқалар бўйича менежер бўлиб ишлаган. Унинг адвокати маълум қилишича, «асоссиз ва адолатсиз қарор» устидан шикоят киритади, унинг мижози эса ҳеч қандай молиявий фойда олмаган.
Прокурорларга кўра, Пампулова-Бергоми ўзининг спорт билан боғлиқ ўтмиши шарофати билан болгариялик собиқ профессионал курашчи Эвелин Банев билан алоқани йўлга қўйган, у эса Болгариянинг кокаин қироли деб аталади. Аёл Баневнинг атрофидаги шахслардан мунтазам равишда нақд пул солинган жомадонларни қабул қилган.
Банев 2017 йил Италияда наркотиклар савдоси учун, 2018 йилда Болгарияда пул ювганлик учун судланган. 2021 йил сентябрида у Киевда қўлга олиниб, ҳибсга жойлаштирилган, у маҳаллий суднинг Болгарияга экстрадиция ҳақидаги қарорини кутмоқда.
Мавзуга доир: «Cредит Суиссе сирлари»: журналистлар Швейцария банкидан сиздирилган ахборот асосида амалга оширилган суриштирувни эълон қилди
Изоҳ (0)