Америка ҳарбий самолётининг Тайвань бўғози устидан парвози минтақадаги тинчлик ва барқарорликка хавф солди, шу муносабат билан Хитой қатъий норозилик билдирди, деб маълум қилди Хитой армияси жанговар қўмондонлиги Шарқий зонаси вакили Ши И.
«Америка томонининг ҳаракатлари минтақага аралашув ва беқарорликни атайлаб бузиш, Тайвань бўғозида тинчлик ва барқарорликка хавф солишдир. Биз бунга қатъиян қарши чиқамиз», — дея таъкидлади армия вакили.
Унинг қўшимча қилишича, Хитой қуролли кучлари мамлакат «миллий суверенитети ва ҳудудий яхлитлигини қатъий ҳимоя қилиш учун доимий равишда юқори жанговар шайлик ҳолатида туради».
Аввалроқ АҚШ Ҳинд-Тинч океани қўмондонлиги баёнот эълон қилиб, 24 июнь куни Тайвань бўғози осмонидан АҚШ Ҳарбий-денгиз кучларининг P-8А Poseidon қайиқ ҳужумига қарши патруль самолёти учиб ўтганини маълум қилганди. Унда айтилишича, бу билан АҚШ ўзининг эркин ва очиқ Ҳинд-Тинч океани минтақаси тарафдори эканини намойиш қилган.
Хитойнинг Global Times нашри Тайван Хитойнинг ажралмас қисми эканини, Тайвань масаласи эса фақат Хитойнинг ички муаммоси бўлиб, мамлакат суверенитети ва ҳудудий яхлитлиги билан чамбарчас боғлиқ эканини таъкидлади.
«АҚШ ва унинг иттифоқчилари аввалроқ Тайвань бўғозининг катта қисмини ‘халқаро сувлар’ деб атаганини қайд этиш жоиз», — деб ёзади газета.
АҚШ Давлат департаменти вакили Нед Прайс 14 июнь куни «Тайвань бўғози халқаро акватория» эканини ва АҚШ «халқаро ҳуқуқ билан рухсат этилган ҳамма жойда, шу жумладан, Тайвань бўғозида ҳам учиш, сузиш ва ҳаракат қилишда давом этиши»ни айтганди.
Нашр қайд этишича, АҚШ ҳарбий кемалари «кучини кўз-кўз қилиб, инқирозларни юзага келтириб ва ‘мустақил Тайвань’ айирмачилик кучларига нотўғри сигналлар юбориб», тез-тез бўғоздан ўтиб туради.
«Бу жуда масъулиятсиз ва хавфли хатти-ҳаракатлар, улар олов билан ўйнашишга тенг», — дейилади Global Times мақоласида.
Изоҳ (0)