Украина ва Молдовага Евроиттифоққа қўшилиш учун номзод мақоми тақдим этилганидан кейин, ЕИга аъзоликка номзод мамлакатлар сони еттитага етди, деб ёзади Anadolu Agency.
23 июнь, Евроиттифоқ мамлакатлари етакчиларининг Брюсселдаги саммитининг биринчи кунида Киев ва Кишинёвнинг номзод мамлакат мақомини олиш ҳақидаги мурожаатлари маъқулланди.
Бундан ташқари, ҳамжамият етакчилари Грузиянинг Европа бўйича истиқболини тасдиқлади. Тбилисига «бирламчи масалалар ҳал қилиниши билан» номзод мақомини тақдим этишга тайёрлик билдирилди. Шу тариқа, Грузия, расман бўлмаса-да, Евроиттифоққа кириш учун потенциал номзодлардан бирига айланди.
Саммитнинг асосий йиғилишидан олдин Евроиттифоқ давлат ва ҳукумат раҳбарлари Ғарбий Болқон давлатлари етакчилари билан учрашди. Аммо бу учрашув Евроиттифоқ билан яқинлашув масаласида ҳеч қандай натижаларни бермади.
Евроиттифоқ етакчиларининг 2003 йилда Салоникида бўлиб ўтган саммитидаёқ олтита Болқон давлати Евроиттифоққа қўшилиш учун «потенциал номзодлар» деб аталганди.
Ушбу норасмий мақом ҳамон Босния ва Герцеговина ҳамда Косовога тегишли бўлиб турибди, Черногория, Сербия, Албания ва Шимолий Македония эса охир-оқибат «номзод» мақомини олган.
Черногория
Черногория Евроиттифоққа аъзолик учун аризани 2008 йилда берган. 2010 йилда Европа комиссияси Подгорицанинг талабномаси бўйича ижобий хулоса берган, бироқ кўп ўтмай, Евроиттифоққа аъзолик борасида музокаралар бошлаш учун еттита шартни илгари сурган.2011 йил декабрида Евроиттифоқ Кенгаши Черногория билан музокаралар бошлашга рози бўлган.
Черногория билан музокаралар расман 2012 йил 29 июнда бошланган.
Сербия
Сербия расмий аризасини 2009 йилда топширган. 2012 йил мартида Белград номзод мақомини қўлга киритган.2013 йил сентябрида Евроиттифоқ ва Сербия ўртасидаги ассоциация тўғрисидаги битим кучга кирган.
2014 йил январида Сербиянинг Евроиттифоққа аъзо бўлиши юзасидан музокаралар расман бошланган.
Албания
Албания Евроиттифоққа аъзолик учун аризани 2009 йилда тақдим этган. 2010 йилда Европа комиссияси 12 та шартни илгари сурган.2012 йил октябрида Европа комиссияси суд тизими ва давлат бошқаруви соҳасида ислоҳотлар якунланиши ҳамда қонунчилик процессуал меъёрлар қайта кўриб чиқилиши шарти билан Албанияга номзод мақоми берилишини тавсия қилди.
2014 йил июнида Европа кенгаши Албанияга номзод мақомини тақдим этди.
Шимолий Македония
Шимолий Македония Евроиттифоққа аъзолик ҳақидаги талабномани 2004 йил мартида берган.Европа комиссияси 2005 йил ноябрида ижобий хулоса берганидан кейин, 2005 йил декабрида Евроиттифоқ кенгаши бу мамлакатга номзод мақомини тақдим этди.
Шу билан бирга, Болгария Албания ва Шимолий Македония билан музокаралар бошланишига вето қўйишда давом этмоқда.
Босния ва Герцеговина ҳамда Косово
Босния ва Герцеговина Евроиттифоққа аъзо бўлиш учун 2016 йил февралида ариза берган. Еврокомиссия 2019 йил майида Сараевога нисбатан тавсия билан чиқди ва мулоқот бошлаш учун 14 та шартни айтди.Шу тариқа, Сараево Евроиттифоққа қабул қилиниш учун потенциал номзодлар сафига киради.
Косовога келсак, бу мамлакат Евроиттифоққа расмий ариза берганича йўқ.
Испания, Греция, Руминия, Словакия ва Кипр Косовонинг мустақиллигини ҳалигача тан олмаяпти.
Қайсидир мамлакатни қабул қилиш учун музокаралар ўтказилади, улар бир неча йилларга чўзилиб кетиши мумкин.
Изоҳ (0)