Европа Иттифоқи Россияга нисбатан қўшимча санкциялар киритишдан воз кечиб, ўрнига музокараларни ривожлантириши керак, деди Венгрия бош вазирининг катта маслаҳатчиси Балаж Орбан Reuters агентлигига. Агентлик у Венгрия бош вазири Виктор Орбаннинг қариндоши эмаслигини қайд этиб ўтди.
«Охир-оқибат, Европа бу урушда иқтисодий муаммолар туфайли ютқазганлар томонида бўлади. Биз санкциялар жараёнини тўхтатишни тавсия қиламиз», — деди Балаж Орбан.
Унинг таъкидлашича, санкциялар сони ортиши билан Европа иқтисодиёти тобора кўпроқ зарар кўрмоқда. Шу билан бирга, Россия зарарларга қарамай, «омон қолмоқда», деди сиёсатчи.
Орбаннинг сўзларига кўра, Европа Иттифоқи тўрт ой давомида санкция босими тактикасига амал қилиб, маълум муваффақиятларга эришди, бироқ буни давом эттириш Европанинг ўзига бундан ҳам каттароқ зарар келтиради. «Шундай экан, биз бирор нима ўйлашимиз керак. Музокаралар, сулҳ, тинчлик, дипломатия. Бу бизнинг қароримиз», — дея хулоса қилди Орбан.
Россияга қарши санкциялар фақат қоғозда самарали экани ҳақида май ойи ўрталарида Венгрия бош вазир Виктор Орбан таъкидлаган эди.
Венгрия бошқа Европа Иттифоқи давлатларидан фарқли ўлароқ Россияга қарши санкциялар киритмади, хусусан, энергия эмбаргосига рози бўлмади. Натижада ЕИ санкцияларининг олтинчи пакетига Россия нефтининг импортини қисман тақиқлаш киритилди.
Reuters хабарига кўра, ЕИ ҳозирда Россияга қарши еттинчи чекловлар пакетини муҳокама қилмоқда ва унга олтинни киритиш имкониятини кўриб чиқмоқда. Бироқ, бу Россияга экспорт ёки импортни тақиқлашни назарда тутадими ёки йўқ, номаълум.
Изоҳ (0)