Украина президенти Владимир Зеленский Украина Хавфсизлик хизмати (УХХ) раҳбари Иван Бакановни лавозимидан озод қилишни режалаштирмоқда. Бу ҳақда Зеленскийга яқин тўрт нафар украиналик амалдор ва Киевга УХХни ислоҳ қилиш бўйича маслаҳат берган ғарблик бир дипломатнинг сўзларига таяниб, Politico хабар берди.
Нашр манбаларига кўра, Баканов уруш пайтидаги бир қатор муваффақиятсизликлар ва Херсоннинг бой берилишидан кейин Украина президентининг ишончини йўқотган. «Биз унинг ишидан жуда норозимиз ва ундан қутулишга ҳаракат қилмоқдамиз», — деди Зеленскийга яқин украиналик юқори мартабали амалдор Politico нашрига.
Нашр суҳбатдошларининг таъкидлашича, гап нафақат Баканов ҳақида, балки УХХнинг бошқа юқори мартабали амалдорларининг урушнинг дастлабки соатлари ва кунларидаги қарорлари ҳақида ҳам кетмоқда — бу қарорлар оқибатида Украина, хусусан, стратегик аҳамиятга эга Херсонни йўқотди. УХХнинг Херсондаги раҳбари Сергей Криворучко рус қўшинлари бостириб киришидан олдин шаҳарни эвакуация қилишни буюрган, унинг ёрдамчиси Игорь Садохин эса русларга миналанган майдонлар харитасини топширган. УХХнинг иккала ходими ҳам давлатга хиёнатда айбланиб ҳибсга олинган.
Бундан ташқари, Украина расмийларига кўра, УХХ зобитлари Днепр орқали Херсонга ўтувчи Антоновский кўпригини портлатиб юбормагани учун 3 март куни Россия қўшинлари шаҳарни осонгина эгаллаб олган.
Украина президенти офиси ҳам, Иван Баканов ёки УХХ ҳам бу ҳақда ҳозирча изоҳ бермади.
Иван Баканов — Владимир Зеленскийнинг болаликдаги дўсти. Баканов 2019 йил августида, Зеленский президент бўлганидан уч ой ўтиб Украина Хавфсизлик хизмати раҳбари бўлган эди. Сўнгги пайтларда, деб ёзади Politico, икки дўст камдан-кам ва фақат ҳукумат масалаларида мулоқот қилмоқда.
Изоҳ (0)