Афғонистонда сел ва тошқинлар оқибатида 16 киши ҳалок бўлди, 400 дан ортиқ уй қисман ёки тўлиқ вайрон бўлди. Бу ҳақда 24 июнь куни TOLOnews телеканали Афғонистон Фавқулодда вазиятлар вазирлигига (ФВВ) таяниб хабар берди.
«Сел ва тошқинлардан кейин 16 киши ҳалок бўлди ва бир киши жароҳат олди. Камида 440 та турар-жой биноси қисман ёки тўлиқ вайрон бўлган. 650 га яқин чорва моллари нобуд бўлди», — деди Афғонистон Фавқулодда вазиятлар вазирлиги раҳбари ўринбосари Ғулом Гавс Носирий.
ФВВ 18 та вилоятда сув тошқинлари ва сел оқимлари юзага келганини маълум қилди. Аниқланишича, 2 минг гектар қишлоқ хўжалиги экинларига зарар етган. Афғонистон қишлоқ хўжалиги ва чорвачилик палатаси сув тошқинлари буғдой ва пиёз экинларига қаттиқ таъсир кўрсатганини маълум қилди.
Шунингдек, 21 июндан 22 июнга ўтар кечаси Афғонистон шарқида кучли зилзила содир бўлиб, 1,5 мингга яқин одам ҳалок бўлган эди. Пактика вилоятидаги Гаян, Бармала, Зирук ва Нака туманлари энг кўп жабр кўрди. Баъзи қишлоқлар бутунлай вайрон бўлган.
Бундан ташқари, 23 июнь куни Кунар вилоятининг тоғли ҳудудларида қор ёғиб, 12 бола ҳалок бўлди. Тоғларда ўтлаб юрган юзлаб уй ҳайвонлари ҳам нобуд бўлди.
Изоҳ (0)