Афғонистонда қутқарув гуруҳлари 1,5 минг кишининг ҳаётига зомин бўлган зилзиладан омон қолганларни қидиришда давом этмоқда, деб ёзади Reuters.
«Толибон» вакиллари қутқарув операцияси деярли якунланганини, аммо алоқанинг ёмонлиги ва нотекс йўллар шундоқ ҳам гуманитар инқироз билан курашаётган мамлакатда қутқарув ишларига тўсқинлик қилаётганини айтган.
«Қутқарув операцияси якунланди, вайроналар остида ҳеч ким қолмаган», — деди «Толибон»нинг зилзиладан энг кўп зарар кўрган Пактика вилоятидаги олий ҳарбий қўмондони матбуот котиби Муҳаммад Исмоил Муовия.
Айни пайтда Фавқулодда вазиятлар вазирлиги матбуот котиби Муҳаммад Нассим Ҳаққоний қутқарув ишлари асосий нуқталарда якунланганини, бироқ айрим изоляциядаги ҳудудларда давом этаётганини айтди.
Афғонистонда 22 июнга ўтар кечаси юз берган 6,1 магнитудали зилзила оқибатида 1,5 минг киши ҳалок бўлган, 2 минг киши жароҳатланган, минглаб иншоотлар вайрон бўлган. «Толибон» етакчиси Ҳайбатулла Охундзода қурбонлар сони ортиши мумкинлигини айтди.
Бирлашган Миллатлар Ташкилоти Бош котиби Антониу Гутерришнинг таъкидлашича, халқаро ташкилот тиббий гуруҳлар ва жиҳозларни етказишда ёрдам бериш учун тўлиқ сафарбар қилинган.
Япония, Жанубий Корея, Тайван ва Бирлашган Араб Амирликлари ёрдам жўнатиш ниятида эканини билдирган. Қўшни Покистондан ёрдам юклари аллақачон чегарадан ўтган. Европа Иттифоқи ҳам ёрдам таклиф қилган. Ўзбекистон Ташқи ишлар вазирлиги фожиа муносабати билан афғон халқига ҳамдардлик билдириб, мамлакатга ҳар томонлама ёрдам кўрсатишга тайёрлигини маълум қилди.
Оқ уй баёнотида айтилишича, АҚШ президенти Жо Байден воқеалар ривожини кузатмоқда ҳамда АҚШ Халқаро тараққиёт агентлиги (USAID) ва бошқа федерал ҳамкорларига жабрланганларга ёрдам бериш имкониятини баҳолашни топширган. АҚШ ҳукуматига кўра, бу Афғонистонда сўнгги йигирма йил ичида содир бўлган энг ҳалокатли зилзиладир.
Афғонистон Евросиё ва Ҳиндистоннинг тектоник плиталари туташган жой яқинида жойлашган Ҳиндукуш тоғ тизмасида тез-тез юз берадиган зилзилалардан азият чекади.
Изоҳ (0)