Ukraina va Moldovaga Yevroittifoqqa qo‘shilish uchun nomzod maqomi taqdim etilganidan keyin, YIga a’zolikka nomzod mamlakatlar soni yettitaga yetdi, deb yozadi Anadolu Agency.
23-iyun, Yevroittifoq mamlakatlari yetakchilarining Bryusseldagi sammitining birinchi kunida Kiyev va Kishinyovning nomzod mamlakat maqomini olish haqidagi murojaatlari ma’qullandi.
Bundan tashqari, hamjamiyat yetakchilari Gruziyaning Yevropa bo‘yicha istiqbolini tasdiqladi. Tbilisiga “birlamchi masalalar hal qilinishi bilan” nomzod maqomini taqdim etishga tayyorlik bildirildi. Shu tariqa, Gruziya, rasman bo‘lmasa-da, Yevroittifoqqa kirish uchun potensial nomzodlardan biriga aylandi.
Sammitning asosiy yig‘ilishidan oldin Yevroittifoq davlat va hukumat rahbarlari G‘arbiy Bolqon davlatlari yetakchilari bilan uchrashdi. Ammo bu uchrashuv Yevroittifoq bilan yaqinlashuv masalasida hech qanday natijalarni bermadi.
Yevroittifoq yetakchilarining 2003-yilda Salonikida bo‘lib o‘tgan sammitidayoq oltita Bolqon davlati Yevroittifoqqa qo‘shilish uchun “potensial nomzodlar” deb atalgandi.
Ushbu norasmiy maqom hamon Bosniya va Gersegovina hamda Kosovoga tegishli bo‘lib turibdi, Chernogoriya, Serbiya, Albaniya va Shimoliy Makedoniya esa oxir-oqibat “nomzod” maqomini olgan.
Chernogoriya
Chernogoriya Yevroittifoqqa a’zolik uchun arizani 2008-yilda bergan. 2010-yilda Yevropa komissiyasi Podgoritsaning talabnomasi bo‘yicha ijobiy xulosa bergan, biroq ko‘p o‘tmay, Yevroittifoqqa a’zolik borasida muzokaralar boshlash uchun yettita shartni ilgari surgan.2011-yil dekabrida Yevroittifoq Kengashi Chernogoriya bilan muzokaralar boshlashga rozi bo‘lgan.
Chernogoriya bilan muzokaralar rasman 2012-yil 29-iyunda boshlangan.
Serbiya
Serbiya rasmiy arizasini 2009-yilda topshirgan. 2012-yil martida Belgrad nomzod maqomini qo‘lga kiritgan.2013-yil sentabrida Yevroittifoq va Serbiya o‘rtasidagi assotsiatsiya to‘g‘risidagi bitim kuchga kirgan.
2014-yil yanvarida Serbiyaning Yevroittifoqqa a’zo bo‘lishi yuzasidan muzokaralar rasman boshlangan.
Albaniya
Albaniya Yevroittifoqqa a’zolik uchun arizani 2009-yilda taqdim etgan. 2010-yilda Yevropa komissiyasi 12 ta shartni ilgari surgan.2012-yil oktabrida Yevropa komissiyasi sud tizimi va davlat boshqaruvi sohasida islohotlar yakunlanishi hamda qonunchilik protsessual me’yorlar qayta ko‘rib chiqilishi sharti bilan Albaniyaga nomzod maqomi berilishini tavsiya qildi.
2014-yil iyunida Yevropa kengashi Albaniyaga nomzod maqomini taqdim etdi.
Shimoliy Makedoniya
Shimoliy Makedoniya Yevroittifoqqa a’zolik haqidagi talabnomani 2004-yil martida bergan.Yevropa komissiyasi 2005-yil noyabrida ijobiy xulosa berganidan keyin, 2005-yil dekabrida Yevroittifoq kengashi bu mamlakatga nomzod maqomini taqdim etdi.
Shu bilan birga, Bolgariya Albaniya va Shimoliy Makedoniya bilan muzokaralar boshlanishiga veto qo‘yishda davom etmoqda.
Bosniya va Gersegovina hamda Kosovo
Bosniya va Gersegovina Yevroittifoqqa a’zo bo‘lish uchun 2016-yil fevralida ariza bergan. Yevrokomissiya 2019-yil mayida Sarayevoga nisbatan tavsiya bilan chiqdi va muloqot boshlash uchun 14 ta shartni aytdi.Shu tariqa, Sarayevo Yevroittifoqqa qabul qilinish uchun potensial nomzodlar safiga kiradi.
Kosovoga kelsak, bu mamlakat Yevroittifoqqa rasmiy ariza berganicha yo‘q.
Ispaniya, Gretsiya, Ruminiya, Slovakiya va Kipr Kosovoning mustaqilligini haligacha tan olmayapti.
Qaysidir mamlakatni qabul qilish uchun muzokaralar o‘tkaziladi, ular bir necha yillarga cho‘zilib ketishi mumkin.
Izoh (0)