Украина ҳарбийлари Северодонецкдан бошқа мустаҳкамроқ позицияларга чекиниш ҳақида буйруқ олган. Бу ҳақда Луганск вилоятининг Украина маъмурияти раҳбари Сергей Гайдай «Дом» телеканали эфирида маълум қилди, деб ёзади «РБК».
Бошловчининг Северодонецкни «ҳозир тарк этишга тўғри келадими?» деган саволига Гайдай шундай жавоб берди: «Афсуски, ҳа. Йигитларимизни олиб кетишга тўғри келади… Ҳозир вазият шунақаки, барбод бўлган позицияларда қолишдан маъно йўқ, чунки кундан-кунга мустаҳкамланмаган ҳудудларда ҳалок бўлганлар сони ошиб бориши мумкин. Шу сабабли шундай қарор қабул қилинди».
Унинг сўзларига кўра, Украина ҳарбий хизматчилари янги мустаҳкамланган туманларга чекиниш буйруғини аллақачон олган.
Россия қўшинлари ва «Луганск халқ республикаси» кучлари Северодонецкни (2014 йилдан Украинанинг Луганск вилояти маркази) май охирида назоратга олгани ҳақида Чеченистон раҳбари Рамзан Қодиров маълум қилганди. Россия мудофаа вазири Сергей Шойгу шаҳарнинг турар-жой даҳалари «озод этилгани», бироқ саноат зоналарида, шу жумладан, Украинадаги энг йирик кимё заводи — «Азот» ҳудудида украиналик ҳарбийлар қолаётганини айтганди.
ЛХРнинг Россиядаги элчиси Родион Мирошникнинг айтишича, «Азот» заводи ҳудудида ўша пайтда қарийб 300—400 украин ҳарбийлари бўлган.
23 июнь куни ЛХР раҳбари Леонид Пасечник ЛХР Халқ милицияси Северодонецкдаги «Азот» кимё заводи саноат зонаси учун жангларни давом эттираётганива тез орада бу ҳудуд назорат остига олинишини айтганди.
Айни вақтда, ЛХР Халқ милицияси расмий вакили Андрей Марочко украин ҳарбийлари Северодонецк ва Лисичанск ҳудудида ёппасига асирликка таслим бўлаётгани, улар орасида асосан оддий аскарлар бўлиб, «бирорта ҳам офицер» йўқлигини маълум қилди. Унинг даъво қилишича, Украина қўмондонлиги қуршовга олиш олдидан чекинган.
Изоҳ (0)