Анқара ва Тель-Авив Ғазо секторидаги воқеаларга турлича баҳо берганидан сўнг, 2018 йилдан бери элчилик алоқаларини тугатган эди. Ўшанда Эрдўғон Исроилни террорчи давлат деб атаган, Нетаньяху эса Туркия раҳбарини ҲАМАСни қўллаб-қувватлашда айблаганди.
Анқара ва Тель-Авив икки томонлама муносабатларнинг дипломатик даражасини ўзаро элчилар тайинлаш даражасигача кўтаради, дея маълум қилди Туркия ташқи ишлар вазири Мевлут Чавушўғли исроиллик ҳамкасби Яир Лапид билан учрашув якунлари бўйича ўтказилган матбуот анжуманида, дея хабар бермоқда Anadolu агентлиги.
«Биз дипломатик ваколатхонамизни элчихона даражасига кўтариш бўйича ишларни бошладик», дейди у. Исроил вазири Лапид бу ниятни тасдиқлади, дея хабар беради Haaretz нашри.
Чавушўғлининг сўзларига кўра, томонлар муносабатлардаги «ижобий мулоқотнинг боришини тасдиқлаган». Исроил ва Туркия дипломатик вакиллик даражасини ўзгартиришдан ташқари, яқин келажакда яна бир олий даражадаги учрашув ўтказиш, «сиёсий ва минтақавий маслаҳатлашувлар» ўрнатиш, аралаш иқтисодий комиссия тузиш масаласини кўриб чиқиш, шунингдек, туризм ва қишлоқ хўжалиги соҳасида ҳамкорликни кенгайтириш ниятида — дея ёзади Hurriyet. Вазир хавфсизлик, хусусан, террорчилик таҳдидларидан ҳимоя қилиш соҳасидаги ҳамкорликка алоҳида эътибор қаратган.
Лапид, Haaretz газетасининг хабарига кўра, Туркияда Эрон ҳужуми таҳдиди остида қолган Исроил фуқароларининг ҳаётини сақлаб қолган учун Туркияга миннатдорчилик билдирган. «Биз нафақат бегуноҳ исроиллик сайёҳларнинг ўлдирилиши ҳақида, балки Эрон террори томонидан Туркия суверенитетини очиқдан очиқ бузаётгани ҳақида ҳам гаплашамиз», деган Лапид.
The Times of Israel нашрининг ёзишича, гап Эрон разведкасида ишлаган ва Истанбулда исроиллик сайёҳларни ўлдириш ёки ўғирлаб кетишни режалаштирган саккиз кишининг Анқара томонидан ҳибсга олингани ҳақида кетмоқда.
Изоҳ (0)