Afg‘onistonda sel va toshqinlar oqibatida 16 kishi halok bo‘ldi, 400 dan ortiq uy qisman yoki to‘liq vayron bo‘ldi. Bu haqda 24-iyun kuni TOLOnews telekanali Afg‘oniston Favqulodda vaziyatlar vazirligiga (FVV) tayanib xabar berdi.
“Sel va toshqinlardan keyin 16 kishi halok bo‘ldi va bir kishi jarohat oldi. Kamida 440 ta turar-joy binosi qisman yoki to‘liq vayron bo‘lgan. 650 ga yaqin chorva mollari nobud bo‘ldi”, — dedi Afg‘oniston Favqulodda vaziyatlar vazirligi rahbari o‘rinbosari G‘ulom Gavs Nosiriy.
FVV 18 ta viloyatda suv toshqinlari va sel oqimlari yuzaga kelganini ma’lum qildi. Aniqlanishicha, 2 ming gektar qishloq xo‘jaligi ekinlariga zarar yetgan. Afg‘oniston qishloq xo‘jaligi va chorvachilik palatasi suv toshqinlari bug‘doy va piyoz ekinlariga qattiq ta’sir ko‘rsatganini ma’lum qildi.
Shuningdek, 21-iyundan 22-iyunga o‘tar kechasi Afg‘oniston sharqida kuchli zilzila sodir bo‘lib, 1,5 mingga yaqin odam halok bo‘lgan edi. Paktika viloyatidagi Gayan, Barmala, Ziruk va Naka tumanlari eng ko‘p jabr ko‘rdi. Ba’zi qishloqlar butunlay vayron bo‘lgan.
Bundan tashqari, 23-iyun kuni Kunar viloyatining tog‘li hududlarida qor yog‘ib, 12 bola halok bo‘ldi. Tog‘larda o‘tlab yurgan yuzlab uy hayvonlari ham nobud bo‘ldi.
Izoh (0)