Украинада Виктор Медведчукнинг «Мухолифат платформаси — ҳаёт учун» партиясининг фаолияти тақиқланди. Украина Адлия вазирлигининг Facebook’даги маълумотларига кўра, ушбу қарор Саккизинчи маъмурий апелляция суди томонидан қабул қилинган.
Медведчук партиясининг барча кўчмас мулклари, ҳисобварақларидаги маблағлари ва бошқа мол-мулки суд қарори билан давлат ҳисобига ўтказилади.
Адлия вазирлиги Украинада «россияпараст партиялар»нинг фаолияти президент Владимир Зеленскийнинг 2022 йил 14 майдаги фармони билан тақиқланганини эслатди.
«Мухолифат платформаси – ҳаёт учун» партияси раҳбари Виктор Медведчук россияпараст сиёсатчи сифатида танилган. ОАВ уни «Владимир Путиннинг қадрдони» деб атайди.
2021 йилда Украина ҳуқуқ-тартибот идоралари Медведчукка давлатга хиёнат ва «миллий бойликларни талон-тарож қилишга уриниш» бўйича иккита айблов қўйди. Медведчук уй қамоғига олинган, хабарларга кўра, у Россия Украинага бостириб кирган дастлабки кунларда қочиб кетган. 12 апрель куни Украина расмийлари Медведчук ҳибсга олингани ҳақида маълум қилди.
Медведчук алмашинув доирасида Россия томонига ўтказилиши мумкинлиги ҳақида таклифлар бор эди, аммо шу пайтгача бу амалга ошмади.
Мавзуга доир: Медведчук Порошенкога қарши кўрсатма берди
Изоҳ (0)