Ukrainada Viktor Medvedchukning “Muxolifat platformasi — hayot uchun” partiyasining faoliyati taqiqlandi. Ukraina Adliya vazirligining Facebook’dagi ma’lumotlariga ko‘ra, ushbu qaror Sakkizinchi ma’muriy apellyatsiya sudi tomonidan qabul qilingan.
Medvedchuk partiyasining barcha ko‘chmas mulklari, hisobvaraqlaridagi mablag‘lari va boshqa mol-mulki sud qarori bilan davlat hisobiga o‘tkaziladi.
Adliya vazirligi Ukrainada “rossiyaparast partiyalar”ning faoliyati prezident Vladimir Zelenskiyning 2022-yil 14-maydagi farmoni bilan taqiqlanganini eslatdi.
“Muxolifat platformasi – hayot uchun” partiyasi rahbari Viktor Medvedchuk rossiyaparast siyosatchi sifatida tanilgan. OAV uni “Vladimir Putinning qadrdoni” deb ataydi.
2021-yilda Ukraina huquq-tartibot idoralari Medvedchukka davlatga xiyonat va “milliy boyliklarni talon-taroj qilishga urinish” bo‘yicha ikkita ayblov qo‘ydi. Medvedchuk uy qamog‘iga olingan, xabarlarga ko‘ra, u Rossiya Ukrainaga bostirib kirgan dastlabki kunlarda qochib ketgan. 12-aprel kuni Ukraina rasmiylari Medvedchuk hibsga olingani haqida ma’lum qildi.
Medvedchuk almashinuv doirasida Rossiya tomoniga o‘tkazilishi mumkinligi haqida takliflar bor edi, ammo shu paytgacha bu amalga oshmadi.
Mavzuga doir: Medvedchuk Poroshenkoga qarshi ko‘rsatma berdi
Izoh (0)