Ўзбекистон икки ойдан бери олтин сотмайди. Сабаби — паст нархлар

Ўзбекистон икки ойдан бери олтин сотмайди. Бу ҳақда «Дарё»га Давлат статистика қўмитаси  ҳисоботидан маълум бўлди.

Мамлакат қимматбаҳо металлни охирги марта март ойида экспорт қилган. Апрель ва май ойларида савдо бўлмади.

Олтин бир неча йилдан буён Ўзбекистоннинг асосий экспорти бўлиб келмоқда. Марказий банк уни жаҳон нархларидан келиб чиқиб сотади.

Март ойида олтиннинг бир унцияси тахминан 1950 долларни ташкил этган бўлса, апрелда 1900 долларгача, май ойида эса 1850 долларгача тушди. Бундай шароитда олтин сотиш мақсадга мувофиқ эмас.

Шунга қарамай, олтин, январдан майгача ҳисоблаганда мамлакатнинг асосий экспорти бўлиб қолмоқда — унинг умумий ҳажмидаги улуши 35,5 фоизни ташкил этади.

Шу фонда Ўзбекистон олтин-валюта захираларида олтин ҳажми ошди— агар март ойи охирида 339 тонна бўлган бўлса, май ойининг охирида 354 тоннани ташкил этди.

Аввалроқ жаҳонда олтин нархи тушгани ҳақида хабар берилган эди.