Арманистонда мансабдорларнинг қариндошлари отишма содир этди, бир киши ҳалок бўлиб, 6 киши яраланди

Арманистон шимолидаги Арагоцотн вилояти Нигаван қишлоғида отишма юз берди, оқибатда бир киши ҳалок бўлди, деб ёзади «РБК».

«Дастлабки маълумотларга кўра, ов қуроли қўлланилган. Етти нафар жабрланувчи турли тиббий муассасаларга етказилган, улардан бири вафот этган. Воқеа сиёсий асосга эга эмас, унинг сабаби маиший хусисият касб этади», — дейилади полиция хабарида.

Отишма ҳақида «Shamshyan.com» портали ҳам хабар берди. Қишлоққа қўшни бўлган Апаран шаҳар касалхонасига турли жароҳатлар, шу жумладан, ўқотар қурол билан берилган жароҳатлар билан етти киши келиб тушган, улардан бири охир-оқибат вафот этган, ярадорлар бошқа тиббий муассасаларга юборилган. Шифокорлар воқеа ҳақида полицияга хабар берган. Ҳолат бўйича жиноят иши қўзғатилган.

«Politik.am» нашри ёзишича, отишма иштирокчилари Арманистон парламенти депутати Матевос Асатрян ва вилоят вице-губернатори Эдгар Парваняннинг қариндошлари ва дўстлари бўлган. Иккала сиёсатчи ҳам мамлакат бош вазири Никол Пашинян етакчилик қилувчи «Фуқаролар келишуви» партияси тарафдорлари ҳисобланади. Нашр маълумотларига кўра, келишмовчиликка Пашинянга қарата айтилган ҳақорат сабаб бўлган — шундан кейин унинг партияси аъзоларининг қариндошлари ўт очишни бошлаган.