Қашқадарё вилоятининг Кўкдала туманида маст эркак отаси ва фарзандига пичоқ билан тан жароҳати етказди. Бу ҳақда вилоят ИИБ ахборот хизмати хабар берди.
Маълум қилинишича, 13 июнь куни эрталаб 06:00 ларда туманнинг «Бахт» МФЙда яшовчи фуқаро П.Ж. маст ҳолатда ўзининг яшаш уйида жанжал кўтариб, отаси С.М. ва фарзандига пичоқ билан ташланган ҳамда уларга тан жароҳати етказган. Шундан сўнг П.Ж. отасини амакисининг уйига қадар қувиб бориб, у билан яна жанжаллашмоқчи бўлганида амакисининг фарзандлари уни тўхтатиб қолган.
Жиноятнинг сабаблари таҳлил қилинганда 32 ёшли эркакнинг бекорчиликдан мунтазам спиртли ичимлик истеъмол қилишга муккасидан кетгани аниқланган. «Бундай вазиятда отанинг босиқлик, вазминлик билан иш кўрмагани таъкидланди. Оқибатда эрталабдан ота-боланинг тортишуви юзага келган. Натижа эса аянчли якун топган», — дейилади хабарда.
Ҳолат юзасидан Кўкдала тумани прокуратураси томонидан П.Ж.га нисбатан Жиноят кодексининг 25, 97-моддаси (қасддан одам ўлдириш) 2-қисми «а,в» бандлари билан жиноят иши қўзғатилиб, Жиноят-процессуал кодексининг 221-моддаси тартибида ушланиб, қамоққа олиш тарзидаги эҳтиёт чораси қўлланган.
Аввалроқ Шаҳрисабз шаҳридаги тўйхонада эркак бир неча киши томонидан пичоқлангани, Самарқандда ўғил ўз отаси ва акасини болта билан чопиб ташлагани, Фарғонада фуқаро икки танишини пичоқлагани тўғрисида хабар берилганди.
Изоҳ (0)