Самарқанд вилояти Ургут туманида 16 ёшли ўсмир каналга чўкиб кетди. Бу ҳақда вилоят прокуратураси хабар берди.
Маълум қилинишича, 8 июнь куни соат 12:00 ларда «Раҳматобод» маҳалласи ҳудудидан оқиб ўтувчи Зарафшон дарёсининг чап қирғоқ каналига шу маҳаллада яшовчи 16 ёшли Ф.М. ўз эҳтиётсизлиги оқибатида тушиб кетиб, чўкиб кетган.
Мазкур ҳолат юзасидан олиб борилган терговга қадар текшириш жараёнида маҳалланинг 65 нафар фуқароси, туман ИИБ ходимлари ҳамда туман ФВБ мутахассислари иштирокида Ф.М. сувга тушиб чўкиб кетган жойлар кўздан кечирилган. 16 июнь куни соат 13:30 ларда «Бойбул» маҳалласи ҳудудидан ўтган Жартепа ва Панжикент йўналишини кесиб ўтувчи Янги Дарғом каналининг ўнг томон қирғоғидан йигитнинг мурдаси тан жароҳатларисиз топилган.
Таъкидланишича, ўлим сабабини аниқлаш учун суд тиббиёт экспертизаси тайинланган, бироқ марҳумнинг ота-онаси ва яқин қариндошлари ҳолат юзасидан бирор-бир кишига даъво ва эътирозлари йўқлигини ҳамда экспертизадан ўтказишга норози эканини билдирган.
«Вояга етмаган Ф.М. ўзининг эҳтиётсизлиги оқибатида сувга тушиб, чўкиб вафот этиши ҳолатида бирор-бир шахснинг ҳаракати ёки ҳаракатсизлигида жиноят таркиби бўлмагани сабабли Ургут туман прокуратураси томонидан жиноят иши қўзғатишни рад этиш ҳақида қарор қабул қилинди», — дейилади хабарда.
Аввалроқ Қашқадарёда 25 ёшли йигит сув омборига чўкиб кетгани, фарғоналик аёл икки нафар фарзанди билан Катта Фарғона каналига чўкиб кетгани, Қашқадарёда 17 ёшли футболчи чўкиб кетиб, вафот этгани тўғрисида хабар берилганди.
Изоҳ (0)