Қурилиш материаллари ва қурилиш саноати миллий ассоциацияси (NOPSM) ва SMPRO таҳлилий маркази томонидан ўтказилган тадқиқот натижаларига кўра, Россияда барча турдаги қурилиш материалларининг ярмини ишлаб чиқариш 70 фоиз ёки ундан кўпроқ миқдорда импорт қилинадиган ускуналарга боғлиқ. Бу ҳақда РБК нашри хабар берди.
Тадқиқот муаллифлари қурилиш материалларининг 26 асосий турини таҳлил қилган. Тўлиқ хорижий ускуналарда ёрдамида ишлаб чиқарилганлар маҳсулотлар сирасига ғишт, плитка ва керамогранит, сантехник керамика, саморез, герметика ва газбетон киради.
Тадқиқот натижаларига кўра, Россиядаги қурилиш кимёвий маҳсулотлари ишлаб чиқарувчилар 90 фоиз, қуруқ аралашмалар 80 фоиз, минерал изоляция ишлаб чиқариш эса 70 фоиз импорт қилинадиган ускуналарга боғланган. Бошқа қурилиш материалларини ишлаб чиқариш ҳам сезиларли даражада Европа ва АҚШдан импорт қилинадиган ускуналарга муҳтож.
Тадқиқот муаллифлари ва РБК билан суҳбатлашган экспертларнинг фикрига кўра, Ғарб ускуналарига юқори даражада қарамлик жорий йилданоқ сезила бошлайди ва агар ҳеч қандай чора кўрилмаса, беш йилдан сўнг бозорда қурилиш материалларининг кескин танқислиги пайдо бўлади.
Нашрнинг ёзишича, Украинага бостириб киришига жавобан Россияга қарши Ғарб давлатлари томонидан киритилган санкциялар туфайли хорижий машиналарни янгилаш учун бутловчи қисмлар етказиб бериш, шунингдек, уларга техник хизмат кўрсатиш мураккаблашган. Ҳозирда қурилиш материаллари ишлаб чиқарувчилари, бошқа чора-тадбирлар қаторида, Ғарб ускуналарини алмаштириш вариантларини кўриб чиқяпти. NOPSM (Россиянинг энг йирик қурилиш материаллари ишлаб чиқарувчиларини бирлаштирувчи ташкилот) уларни Беларусь, Эрон, Ҳиндистон ва Хитой ускуналари билан алмаштириш мумкинлигига умид қилмоқда.
Изоҳ (0)