Анқаранинг Сурия шимолида махсус операция ўтказиши минтақада кескинликнинг кучайишига олиб келади. Бу ҳақда Россия президентининг Сурия бўйича махсус вакили Александр Лаврентев журналистларга айтиб ўтди.
«Бизнинг фикримизча, бу операция вазиятни беқарорлаштириб, кескинликни кучайтирадиган ва ушбу мамлакатдаги қуролли қарама-қаршиликнинг янги босқичига олиб келадиган бемаъни қадам бўлади», — деди у.
Лаврентевнинг сўзларига кўра, Россия Нур-Султондаги музокараларда туркиялик ҳамкасбларини бу қадамдан тийилишга ва юзага келган хавотирларни томонлар ўртасидаги мулоқот орқали ҳал қилишга ундайди.
Бундан ташқари, президент вакили Суриядаги можарони ҳал қилиш Россия ташқи сиёсатининг устувор йўналиши бўлиб қолаётганини айтди. «Ҳозир кўпчилик Украинада махсус ҳарбий операция ўтказилиши муносабати билан Россиянинг Сурияга эътибори заифлашганини айтмоқда. Сурияни тартибга солиш ҳали ҳам Россия ташқи сиёсатининг устувор йўналишларидан биридир. Сурия халқига ҳар томонлама ёрдам беришда давом этамиз», — деди у.
Шу билан бирга, у АҚШни ИШИДга қарши кураш баҳонасида Сурия шимоли-шарқида «талончилик фаолияти»ни олиб бораётганликда айблади.
Аввалроқ Туркия қуролли кучлари ва Сурия эркин армияси жангарилари Сурияда янги операция ўтказиш учун тайёргарлик ишларини якунлагани маълум бўлганди. Айни дамда армия операцияни бошлаш учун Анқаранинг буйруғини кутмоқда. Қайд этилишича, турк ҳарбийлари Тел-Рифат ва Манбиж шаҳарлари атрофида жанговар позицияларни эгаллаб, террорчи гуруҳлар позицияларини ўққа тутмоқда.
Изоҳ (0)