Рамзан Қодиров Путиннинг саломатлиги билан боғлиқ муаммолар ҳақидаги хабарларни рад этди. Украина ОАВлари у комага тушгани ҳақида ёзганди

Чеченистон раҳбари Рамзан Қодиров Россия президенти Владимир Путин соғ-саломат экани, унинг «овози тетик ва командирларга хос» келаётгани ва у ҳарбий операцияни охиригача етказишга тайёрлигини маълум қилди, деб ёзади «Коммерсантъ».

Аввалроқ Украина ОАВлари Путин комага тушиб қолгани ҳақида ёзганди. Кремль сайтидаги маълумотларга кўра, президент 15 июнь куни учрашувлар ва телефон орқали суҳбатлар ўтказган.

«Бемаъни, беҳуда гапларни ўқиб қолдим: президентимиз комага тушибди, унга ўринбосар қидириляпти эмиш. Ҳафсалангизни пир қилмоқчиман. Ҳозиргина президент билан гаплашдим, унинг овози тетик, командирларга хос эди. Ва у махсус операцияни украин халқига ва давлатига максимал даражада зиён етказмасдан якунлашга тайёр», — деди Рамзан Қодиров Telegram-каналига жойлаган аудиохабарида.

Унинг қўшимча қилишича, бундай ахборотни тарқатаётган давлатлар «оғизларини ёпиши керак». «Кейин баҳоналар қидириб жуда ноқулай аҳволга тушасиз, агар бунга вақтингиз қолса», — деди Қодиров.

15 июнь куни Владимир Путин Жанубий Африка Республикаси президенти Сирил Рамафоза билан мулоқот қилди, дейилади Кремль сайтида. У, шунингдек, ХХР раиси Си Цзиньпин билан ҳам телефон орқали музокаралар ўтказган. Муҳокама мавзуси Украина ҳамда ҳарбий алоқаларни ривожлантиришдан иборат бўлган.

Президент матбуот котиби Дмитрий Песков 16 июнь куни Владимир Путин Санкт-Петербургга жўнаб кетишини маълум қилганди — шу куни у бир қатор тадбирларни режалаштирган. 17 июнь куни эса давлат раҳбари Петербург халқаро иқтисодий форумида нутқ сўзлайди.

Эслатиб ўтамиз, аввалроқ АҚШ разведкаси Россия президенти Владимир Путиннинг апрель ойида онкологик хасталикдан даволаниш курсларини ўтказгани ҳақида ҳисобот тайёрлаганди.

Владимир Путиннинг соғлиғида муаммолар кузатилгани, унинг онкологик касалликка чалингани ҳақидаги гап-сўзлар сўнгги ойларда ОАВда кўп тарқалмоқда. 2022 йил май ойида Путиннинг саратонга чалингани ҳақида режиссёр Оливер Стоун ҳам гапирганди. «Проект» нашри Путиннинг шифокорлар гуруҳи ҳамроҳлигида юргани, улар орасида онкологик касалликлар ва қалқонсимон без муаммолари бўйича мутахассислар ҳам борлиги ҳақида ёзган.

Россия ташқи ишлар вазири Сергей Лавров май охирида «ақлли одамлар» Путинда қандайдир хасталик ёки соғлиғи билан боғлиқ муаммоларни кўра олмаслиги ҳақида баёнот берган.