Шотландия биринчи вазири Никола Стержен мамлакат мустақиллиги бўйича янги референдум ўтказиш ниятида эканини маълум қилди.
«Бўлиб ўтган ҳамма нарса — Brexit, Борис Жонсон, коронавирусдан сўнг Шотландияни қандай қилиб янада фаровон ва одил мамлакат қилиш ҳақида гапирадиган вақт келди. Мустақиллик ҳақида гапириш ва бундай танловни амалга ошириш вақти келди», — деди у Эдинбургдаги қароргоҳида ўтказилган матбуот анжуманида.
«Биз... Вестминстер ҳукуматининг биз овоз бермаган қарорларига қарам бўлмаймиз», — дея қўшимча қилди Стержен.
Унинг ишонтиришича, ҳар қандай референдум қонунга мувофиқ ўтказилади ва ҳозирда Шотландия ҳукумати буни Буюк Британия ҳукуматининг рухсатисиз ўтказиш йўлини қидирмоқда.
Шотландия ҳукумати веб-сайтида мамлакат мустақиллиги фойдасига далиллар келтирувчи, шунингдек, вазиятнинг иқтисодий ва ижтимоий контексти ёритилган янги ҳужжат эълон қилинди.
Аввал ҳам Стержен 2023 йилда яна бир мустақиллик референдумини ўтказиш нияти борлигини маълум қилган, бироқ Британия бош вазири Борис Жонсон иккинчи референдумга йўл қўймаслигини, чунки Шотландия халқи 2014 йилдаёқ ўз истагини билдирганини бир неча бор таъкидлаган. Ўшанда ўтказилган референдумда шотландияликларнинг 55 фоизи Британия таркибида қолишни ёқлаб, 45 фоизи қарши овоз берган эди. Шотландиядаги референдум учун марказий ҳокимиятнинг розилиги талаб қилинади.
Изоҳ (0)