Самарқанддаги шифохонада ёш боласига шафқатсиз муносабатда бўлаётган аёл видеоси ижтимоий тармоқларда тарқалиб, кенг муҳокамаларга сабаб бўлди. Вилоят ИИБ матбуот хизмати ҳолат юзасидан жиноят иши қўзғатилганини маълум қилди.
ИИБ матбуот котиби Жаҳонгир Сагдуллаевнинг билдиришича, мазкур воқеа 14 июнь куни вилоятнинг Пайариқ туманида содир бўлган. Туманнинг «Бошқўрғон» МФЙда яшаб келаётган аёл (1988 йилда туғилган) 2020 йилда туғилган, вояга етмаган фарзандини даволатиш учун шифохонага олиб борган. У ерда стресс ва асабий ҳолатда фарзандига нисбатан ушбу ҳаракатларни содир этган.
Айни пайтда аёл руҳий соғлом, турмуш ўртоғи билан яшаб келмоқда.
Содир бўлган ҳолат юзасидан эса Жиноят кодексининг 110-моддаси 2-қисми «а, в» бандлари (вояга етмаган, ожиз аҳволдалиги айбдорга аён бўлган шахсга нисбатан қийнаш ҳаракатларини содир этиш) билан жиноят иши қўзғатилиб, тергов ҳаракатлари олиб борилмоқда.
Шунингдек, билдирилишича, шу болакай улғаяётган оила билан келгусида амалга оширилиши лозим бўлган чора-тадбирлар тегишли мутасадди ташкилотлар билан ҳамкорликда белгилаб олинмоқда.
Аввалроқ Қорақалпоғистонда она ўз фарзандларига зулм ўтказиб, болаларни хўрлагани тасвирланган видео тарқалганди. Кейинроқ аёл Қорақалпоғистон ИИВ ходими билан суҳбатда нима сабабдан фарзандларини калтаклаб келганини маълум қилганди. Ҳолат юзасидан жиноят иши қўзғатилган.
Изоҳ (0)