Ижтимоий тармоқларда Ишхитон туманида она ва бола бир аёлни «самосуд» қилгани тасвирланган видео тарқалди. Самарқанд вилояти ИИБнинг маълум қилишича, ҳолат бўйича тергов ҳаракатлари бошланган.
Видеода она ўғли билан бошқа бир аёлни калтаклагани, уни тепиб, қўлини қайиргани тасвирланган. Атрофдаги фуқароларнинг аёл кишини урмасликни сўраб айтган гапларига йигит «отаси урганда нега аралашмагансизлар? У мендан қочиб юрибди», дея жавоб қайтарган.
Самарқанд вилояти ИИБ матбуот котибига кўра, видеодаги ҳолат Иштихон туманининг «Орлот» МФЙ ҳудудидаги фермер хўжаликларидан бирида содир бўлган. Ушбу фермер хўжалигидаги ер майдонидан ижарачи сифатида фойдаланиб келаётган аёллар ўртасида юзага келган ўзаро келишмовчилик жанжалга айланиб кетган. Жанжалга ижарачи аёлнинг ўғли ҳам аралашиб, иккинчи ижарачига тан жароҳатлари етказган.
Ҳолат юзасидан Иштихон тумани ИИБ Тергов бўлими томонидан Жиноят кодексининг 277-модда (безорилик) 2-қисми билан жиноят иши қўзғатилган. Ҳозирда тергов ҳаркатлари олиб борилмоқда.
Аввалроқ Қашқадарёда ўғирлик қилган фуқаро «самосуд» қилинган эди. Мазкур ҳолат юзасидан фурқарога нисбатан жиноят иши қўзғатилиб, қамоққа олиш тарзидаги эҳтиёт чораси қўлланилган.
Изоҳ (0)