Қўшработ туманида ўтказилаётган халқ депутатлари Қўшработ тумани кенгашининг навбатдан ташқари сессиясида ташкилий масала кўрилди. Бу ҳақда Самарқанд вилояти ҳокимлиги матбуот хизмати хабар берди.
Қўшработ тумани ҳокими вазифасида фаолият олиб борган Ҳиммат Оқбўтаев бошқа ишга ўтиши муносабати билан ўз аризасига асосан эгаллаб турган вазифасидан озод этилган. Маълумот учун, Ҳиммат Оқбўтаев 2016 йил 23 декабридан 2017 йил 12 июнига қадар Самарқанд вилоятига ҳокимлик қилган эди. У президент Шавкат Мирзиёев раислигида ўтказилган видеоселектор йиғилиши давомида ишдан олинган ва 2017 йил ноябрда Қўшработ тумани ҳокими этиб тайинланган эди.
Сессияда депутатлар томонидан Дилшод Шакарбоев номзоди Қўшработ тумани ҳокими лавозимига тасдиқланган.
Тайинловга қадар Дилшод Шакарбоев Самарқанд вилояти Иқтисодий тараққиёт ва камбағалликни қисқартириш бош бошқармаси бошлиғининг биринчи ўринбосари лавозимида фаолият олиб борган.
Шунингдек, халқ депутатлари Иштихон тумани кенгашининг навбатдан ташқари сессиясида туман ҳокими вазифасида фаолият олиб борган Шуҳрат Негматов бошқа ишга ўтиши муносабати билан ўз аризасига асосан эгаллаб турган вазифасидан озод этилган.
Сессияда депутатлар томонидан Фазлиддин Рўзиев номзоди Иштихон тумани ҳокими лавозимига тасдиқланган.
Мазкур тайинловга қадар Фазлиддин Рўзиев Вазирлар Маҳкамасининг Маҳаллий саноатни ва кооперация алоқаларини ривожлантириш масалалари котибияти мудирининг ўринбосари лавозимида фаолият олиб борган.
Аввалроқ Сирдарё вилояти ҳокимига янги ўринбосар тайинлангани, Китоб туманининг собиқ ҳокими Муроджон Азимовга ўринбосар бўлгани тўғрисида хабар берилганди.
Изоҳ (0)