Qo‘shrabot tumanida o‘tkazilayotgan xalq deputatlari Qo‘shrabot tumani kengashining navbatdan tashqari sessiyasida tashkiliy masala ko‘rildi. Bu haqda Samarqand viloyati hokimligi matbuot xizmati xabar berdi.
Qo‘shrabot tumani hokimi vazifasida faoliyat olib borgan Himmat Oqbo‘tayev boshqa ishga o‘tishi munosabati bilan o‘z arizasiga asosan egallab turgan vazifasidan ozod etilgan. Ma’lumot uchun, Himmat Oqbo‘tayev 2016-yil 23-dekabridan 2017-yil 12-iyuniga qadar Samarqand viloyatiga hokimlik qilgan edi. U prezident Shavkat Mirziyoyev raisligida o‘tkazilgan videoselektor yig‘ilishi davomida ishdan olingan va 2017-yil noyabrda Qo‘shrabot tumani hokimi etib tayinlangan edi.
Sessiyada deputatlar tomonidan Dilshod Shakarboyev nomzodi Qo‘shrabot tumani hokimi lavozimiga tasdiqlangan.
Tayinlovga qadar Dilshod Shakarboyev Samarqand viloyati Iqtisodiy taraqqiyot va kambag‘allikni qisqartirish bosh boshqarmasi boshlig‘ining birinchi o‘rinbosari lavozimida faoliyat olib borgan.
Shuningdek, xalq deputatlari Ishtixon tumani kengashining navbatdan tashqari sessiyasida tuman hokimi vazifasida faoliyat olib borgan Shuhrat Negmatov boshqa ishga o‘tishi munosabati bilan o‘z arizasiga asosan egallab turgan vazifasidan ozod etilgan.
Sessiyada deputatlar tomonidan Fazliddin Ro‘ziyev nomzodi Ishtixon tumani hokimi lavozimiga tasdiqlangan.
Mazkur tayinlovga qadar Fazliddin Ro‘ziyev Vazirlar Mahkamasining Mahalliy sanoatni va kooperatsiya aloqalarini rivojlantirish masalalari kotibiyati mudirining o‘rinbosari lavozimida faoliyat olib borgan.
Avvalroq Sirdaryo viloyati hokimiga yangi o‘rinbosar tayinlangani, Kitob tumanining sobiq hokimi Murodjon Azimovga o‘rinbosar bo‘lgani to‘g‘risida xabar berilgandi.
Izoh (0)