Қирғизистон ва Тожикистон чегарасида отишма юз берди, Тожикистон томони гранатомёт ва миномётларни қўллади, деб хабар бермоқда Қирғизистон давлат миллий хавфсизлик қўмитаси Чегара хизмати 14 июнь куни.
«7:00 атрофида (Тошкент вақти билан 6:00) Боткен вилояти Боткен туманидаги Булоқбоши қишлоғида Тожикистоннинг ‘Кўҳ’ чегара пости томонидан Қирғизистоннинг ‘Булоқбоши’ чегара постига қарата ўқ отилди. Бунга жавобан Қирғизистон томонидан Тожикистон постига қарата жавоб ўқи отилди», — дейилади чегара хизмати хабарида.
Унинг маълумотларига кўра, икки томон чегарачилари дарҳол жанговар позицияларни эгаллаган. Қирғизистоннинг Боткен вилояти бўйича чегара вакили ва Тожикистоннинг Сўғд вилояти бўйича чегара вакили телефон орқали суҳбатлашган. Воқеа жойига томонларнинг чегара отрядлари бошлиқлари жўнаб кетган.
«7:50 да Тожикистон томони гранатомёт ва миномётлар орқали яна отишма бошлади. 8:10 да отишма тўхтади. Айни пайтда отишма сабабларини аниқлаштириш ва вазият кучайиб кетишига йўл қўймаслик учун томонларнинг чегара вакиллари учрашув ўтказмоқда», — дея маълум қилди Чегара хизмати.
Чегаранинг қирғиз-тожик қисмидаги вазият кескин деб тавсифланмоқда.
Қирғизистон ва Тожикистон чегараси вақти-вақти билан икки мамлакат маҳаллий аҳолиси ва чегарачилари ўртасидаги низолар ҳудудига айланиб туради. Бунга сабаб делимитация қилинмаган ерлар бўлиб, у ерларда давлатлар ўртасидаги чегара қаердан ўтишини аниқлаб бўлмайди.
Изоҳ (0)