Литва Украина учун Эстонияда ишлаб чиқарилган олтита разведка дронларини сотиб олди, улардан тўрттаси Украина томонига ҳозир юборилган бўлса, яна иккитаси икки ой ичида жўнатилади. Украина ҳарбийлари аллақачон улар билан ишлашни ўрганмоқда, дея маълум қилди май ойида Bayraktar ТB2 учун пул йиғган Laisves телеканали раҳбари Андрюс Тапинас.
«Биз олтита замонавий EOS C-VTOL разведка дронларини сотиб олдик, улар электр энергияси билан ишлайди, минимал из қолдиради, лазер билан жиҳозланган, исталган жойга учади ва қўнади», — деб ёзди у Facebook’да.
Тапинаснинг сўзларига кўра, ишлаб чиқарувчилар қурилмаларга душманни йўлдан адаштирувчи, парвоз ва қўниш жойларини кўздан бекитувчи махсус антенна ҳамда эҳтиёт қисмлар тўпламини қўшиб беради. Битимнинг умумий қиймати 990 000 еврони ташкил этди. Тапинас Эстония қурилмаларини Магйла деб атади. Twitter’да у Украина ҳарбийлари дронларни бошқаришни аллақачон ўрганаётганини қўшимча қилди.
Шунингдек, у Туркиянинг Bayraktar дронлари биринчи партиясини харид қилиш бўйича келишувга эришилганини маълум қилди.
2 июнь куни Литва ҳукумати Туркия билан Украина армияси эҳтиёжлари учун Bayraktar дронларини сотиб олиш бўйича шартнома имзолаган эди.
Изоҳ (0)