«Швеция ҳукумати НАТОга аъзо бўлиш имкониятини кўриб чиқиш жараёнида Туркиянинг хавфсизлик билан боғлиқ муаммоларини ҳисобга олади ва Анқара билан ҳамкорликни давом эттиради», деди душанба куни Швеция бош вазири Магдалена Андерссон.
«Биз Туркиянинг хавфсизлик ва терроризмга қарши кураш билан боғлиқ бўлган масалалардаги хавотирини жуда жиддий қабул қиламиз. Биз Туркия билан икки ва уч томонлама мулоқот олиб бормоқдамиз» — дея қўшимча қилган Швеция бош вазири НАТО бош котиби Йенс Столтенберг билан бўлган қўшма матбуот анжуманида.
Ўз навбатида, НАТО бош котиби Швециянинг бу позициясини олқишлаган.
«Швеция ҳукуматининг Туркияни ташвишга солаётган муаммоларни муҳокама қилишга тайёрлигидан мамнунман», — деган Столтенберг.
Столтенбергнинг сўзларига кўра, «асосий мақсад — Финляндия ва Швецияни НАТОнинг тўлақонли аъзоси сифатида тезроқ иттифоққа қабул қилиш учун имкон қадар тезроқ ечим топиш».
Финляндия ва Швеция 18 май куни НАТОга кириш учун ариза топширганди. Бироқ Туркия ҳозирда ушбу аризаларни кўриб чиқишга тўсқинлик қилмоқда. Анқаранинг Скандинавия давлатларига қарши бир қанча даъволари бор: хусусан, Туркия Швеция ва Финляндияни Туркияда террорчи деб топилган курд гуруҳларини қўллаб-қувватлашда айблайди.
Изоҳ (0)