Руминия ҳукумати Бухарестда яшаган эркакда маймунчечак аниқланганини маълум қилди. Бу мамлакатда мазкур касалликка чалиниш билан боғлиқ биринчи ҳолат.
Маймун чечагига чалинган бемор 26 ёшда, дейилади Руминия соғлиқни сақлаш вазирлигининг ахборотида.
Reuters агентлигининг хабар қилишича, ССВ маълумотларига кўра, беморнинг шериги Европанинг бир қатор мамлакатларида, жумладан, маймунчечак билан касалланиш ҳолатлари кўп қайд этилган давлатларда бўлиб қайтган. Бемор изоляция қилинган ҳолда даволанмоқда ва унинг ҳолати яхши эканлиги маълум қилинган.
Маймун чечагининг асосий белгиси тошма бўлиб, у оғриқли бўлиши ва терида қичима пайдо қилиш мумкин. Касаллик енгил шаклда кечмоқда ва икки ёки уч ҳафтада ўтиб кетади. Маймунчечак билан боғлиқ ҳолатлардаги ўлим кўрсаткичи 1 фоиздан 10 фоизгача.
Аввал ЖССТ маймунчечакка қайта чалиниш хавфидан огоҳлантиргани, Португалияда маймунчечак билан касалланганлар сони 150 нафардан ошгани, Нигерияда маймунчечак сабаб ёввойи ҳайвонларнинг гўштини сотиш тақиқлангани, миллиардер Билл Гейтснинг маймунчечак хавфини баҳолаб, янги пандемия қачон юзага келишини прогноз қилгани ҳақида хабарлар берилганди.
Изоҳ (0)