Россия кучлари Украинадаги махсус операциялар чоғида биринчи навбатда Донецк ва Луганск халқ республикаларини ҳимоя қилишга интилмоқда, дея маълум қилди Россия президенти матбуот котиби Дмитрий Песков.
«Умуман олганда, республикаларни ҳимоя қилиш — махсус ҳарбий операциянинг асосий мақсади», — деди у.
Бир кун аввал, 13 июнда ДХР раҳбари Денис Пушилин Донецк ва республиканинг бошқа шаҳарлари ўққа тутилиши сабабли украин қўшинлари «барча чегараларни босиб ўтгани» ҳақида айтган эди. У: «Уруш олиб боришнинг тақиқланган усуллари қўлланилмоқда, Донецкнинг турар-жой ва марказий туманлари ўққа тутилмоқда, шунингдек, ДХРнинг бошқа шаҳарлари ва аҳоли пунктлари ҳам ўт остида қолмоқда», — деди.
Ўққа тутишлар туфайли «иттифоқ кучларининг барча зарур қўшимча кучларини» ишга солиш режалаштирилмоқда, дея давом этди Пушилин, гап асосан Россия ҳақида бораётганини қайд этиб. Унинг айтишича, бу масалада «англашувга келинган», айнан ким биланлигига аниқлик киритмади.
Донецк янгиликлар агентлиги қайд этишича, 13 июнь куни Украина қуролли кучлари ДХРга низо бошидан буён рекорд даражада кўп зарбалар берган. Улар, шу жумладан, «Ураган» ва «Град» баравар ўт очиш реактив тизимлари орқали берилган.
Хусусан, Донецкда бир бозор ўқ ёмғири остида қолган, уч киши ҳалок бўлган. Туғруқхона ҳам ҳужумга учраган, беморлар ертўлага эвакуация қилинган.
22 апрель куни Россия Мудофаа вазирлиги ҳарбий операция иккинчи босқичининг мақсади Донбасс ва Жанубий Украина устидан тўлиқ назорат ўрнатиш эканини айтганди. Май бошида Россия ташқи ишлар вазири Сергей Лавров махсус операция шарқий Украина ва Россия хавфсизлигини таъминлаш мақсадини кўзлашини маълум қилганди. Шу билан бирга, вазирнинг сўзларига кўра, Москва Украинада ҳокимият алмашишига эришмоқчи эмас.
Изоҳ (0)