«Lisa.ru» нашри қуйидаги Голливуд юлдузларининг ҳамкасблари билан муштлашувига нима сабаб бўлгани ҳақида маълумот беради.
Сильвестр Сталлоне ва Ричард Гир
1973 йилда эндигина кинога қадам қўйган актёр Ричард Гир Сильвестр Сталлоне билан бирга ўйнаши керак бўлган «Флатбаш лордлари» фильмидаги бош ролга маъқулланади. Бироқ актёрлар биринчи кунданоқ келиша олмайди: улар доимо баҳслашар, муносабатларини аниқлаштириб олмоқчи бўлар, Сталлоне эса тажрибасиз ҳамкасби устидан куларди.
Бир куни буларнинг ҳаммаси муштлашув билан тугайди. Жанжал тушлик пайтида Ричард Сильвестернинг машинасига ёғли товуқ гўшти билан ўтирганидан бошланади. У дарҳол ташқарига чиқишни, машинани ифлос қилмасликни айтади, лекин Гир унга эътибор ҳам бермайди.
«У товуқнинг бир бўлагини тишлаганда шимимга хантал томди. Шунда тирсакларим билан бошига яхшилаб солдим ва машинадан итариб юбордим. Режиссёр иккимиздан биримизни танлаши керак эди: кимдир қолиши, кимдир эса кетиши шарт эди», — деб эслайди Сталлоне.
Гирнинг нафақат қоши ёрилади, балки ролидан ҳам айрилади. Режиссёр кўпроқ тажрибага эга Сильвестрни танлайди.
Том Круз ва Роб Лоу
80 йилларнинг бошларида ёш Том бош қаҳрамонлари кўча тўдаси аъзолари бўлган «Қувилганлар» фильмида роль ўйнайди. Круз ва Лоу ўртасидаги муштлашув саҳнасини репетиция қилиш пайтида Роб Томга шунчалик қаттиқ зарба берадики, у даҳшатли оғриқни ҳис қилади.
Актёрнинг бундан жаҳли чиқиб, унга ҳам жавоб қайтармоқчи бўлади. Натижада ҳақиқий муштлашув бошланади, суратга олиш гуруҳи аъзолари съёмкани тўхтатишга мажбур бўлади. Шундан сўнг Крузга ишдан бўшатиш билан таҳдид қилишади, актёр суратга олиш майдончасида ўзини қандай тутиши кераклигини тушунтириб қўйишади.
Жорж Клуни ва Дэвид О. Расселл
Ҳеч ким хотиржам ва ақлли Жорж бир вақтлар ўзини йўқотиб, суратга олиш майдончасида муштлашган деб ўйламаса керак. Аммо бу воқеа 1999 йилда у «Уч қирол» фильмида рол ўйнаётганида содир бўлади. Ўшанда Клунига режиссёр Дэвид О. Расселнинг суратга олиш майдончасидагиларга овозини кўтаргани ёқмайди.
Клуни режиссёрга сабоқ бериб қўймоқчи бўлиб, у билан баҳслашиб кетади. Оғзаки айтишувдан сўнг муштлашув бошланади. Бир-бирини уриб ётган эркакларни продюсер Чарльз Ровен ажратиб қўяди. Қизиғи шундаки, воқеадан кейин Жорж лойиҳада қолади ва уни якунлайди.
Льюси Лиу ва Билл Мюррей
Кўпчилик Льюсини «юбкадаги Жеки Чан» деб атайди, чунки у блокбастер юлдузи ҳисобланади. Актриса жанг санъати билан шуғулланади ва фильмларда ҳам каскадёрсиз ўзи жанг қилади, шунинг учун уни яхши билганлар Льюни хафа қилмаслик кераклигини билишади. Бироқ продюсер Билл Мюррей буни ҳисобга олмай, «Чарли фаришталари» фильмини суратга олиш пайтида Льюсининг устидан кулади.
Актриса уни бир неча бор огоҳлантиради, аммо Билл актрисани аҳмоқ ва истеъдодсиз дейди. Льюси бундай ҳақоратга чидай олмайди ва Биллга ташланиб қолади. Ҳамкасблар ва суратга олиш гуруҳи уларни зўрға ажратиб олади. Мюррей ушбу лойиҳадаги ишидан четлаштирилади, Лью эса хотиржам суратга тушишни давом эттирди.
Изоҳ (0)