Япония ҳукумати халқаро майдондаги вазият туфайли яқин беш йил ичида мамлакатнинг ҳарбий имкониятларини кескин оширишни мақсад қилган. Бу ҳақда Япония бош вазири «Шангри-Ла» мулоқоти номини олган хавфсизлик бўйича Осиё саммитида маълум қилган, деб ёзмоқда «Интерфакс».
«Кисида хавфсизлик соҳасидаги вазият тобора кескинлашиб бораётганини қайд этди, Япония кейинги беш йил ичида ҳарбий имкониялатларини оширади, бироқ бетарафлик позициясини ҳам сақлаб туради», – дея хабар қилган Кёдо.
Шунингдек, Япония бош вазири мазкур ҳаракатлар учун мамлакатнинг мудофаа сарф-харажатларини жиддий ошириш талаб этилиши ва ҳукумат миллий хавфсизлик стратегиясига ўзгартириш киритишни режалаштирганини таъкидлаган.
Кисида Япониянинг Осиёдаги геосиёсий вазиятни ўзгартиришга бир томонлама уринишларга қарши туриши ҳақида ваъда берган. Токио минтақа мамлакатларига уч йил ичида 2 миллиард доллар ажратади ва бу орқали улар денгиз ҳимояси, денгиздаги транспортни яхшилаб олиши мумкин. Кисида Жануби-Шарқий Осиё ва Тинч океани ҳудуди мамлакатлари минтақада «озодлик ва очиқликни» таъминлашда муҳим ўрин тутишига урғу қаратган.
Май бошида Япония мудофаа вазири Нобуо Киси Пентагон раҳбари Ллойд Остин билан учрашувда Токионинг ҳарбий потенциалини яхшилашни режалаштираётганини айтганди.
Япония ОАВ мамлакатнинг 2022 йил охиригача миллий хавфсизлик стратегиясини янгилашни режа қилгани ҳақида хабарлар тарқатган. Япониядаги ҳукмрон Либерал-демократик партия ҳарбий харажатларни сезиларли даражада ошириб, мамлакат ялпи ички маҳсулотининг 1 фоизидан 2 фоизига оширишни таклиф қилган, бу орқали ҳарбий низо келиб чиқадиган бўлса, душман ҳудудига ракеталар билан зарба бериш имконияти ошишини билдирган.
Изоҳ (0)