АҚШ Донецк Халқ Республикаси суди томонидан икки британиялик ва бир нафар марокашликка ўлим жазоси тайинланганидан хавотирда. Бу ҳақда Давлат департаменти раҳбари Энтони Блинкен Twitter’даги саҳифасида маълум қилди, деб ёзади «РБК».
«Биз Россия ва унинг назорати остидаги кучларни халқаро гуманитар ҳуқуққа, жумладан, ҳарбий асирларга берилган ҳуқуқ ва ҳимояга ҳурмат кўрсатишга чақирамиз», — деб ёзади Блинкен. Унга кўра, ҳукм қилинган хорижликлар Украина Қуролли кучларида қонуний асосларда хизмат қилган.
Шу билан бирга, Блинкен, агар ҳукм амалга оширилса, АҚШ унинг ижросига бирор тарзда жавоб қайтарадими ёки йўқлигини айтмаган.
ДХР Олий суди Украина томонидаги жанговар ҳаракатларда ёлланма жангчилар сифатида қатнашганликда айбланган британиялик Шон Пиннер ва Эйдин Эслинни ҳамда марокашлик Саадун Брагимни ўлим жазосига ҳукм қилган эди. Жазо судланувчиларга «жиноятлар жамланмаси бўйича» тайинланди.
Улар устидан суд жараёни 7 июнь куни бошланган, улар ДХР Жиноят кодексининг 34-моддаси («Бир гуруҳ шахслар томонидан жиноят содир этиш»), 323-моддаси («Ҳокимиятни мажбуран тортиб олиш ёки ҳокимиятни мажбуран ушлаб туриш») ва 430-моддаси («Ёлланиш») билан айбланмоқда. Маҳбуслар ўз айбларига қисман иқрор бўлган.
Британия расмийлари ҳам ушбу ҳукмни қоралади. Британия ташқи ишлар вазири Лиз Трасс ДХР судининг қарорини тўқима ва ҳеч қандай қонунга асосланмаган деб атади.
Изоҳ (0)